बिर्तामोड । केहि दिनदेखि फोहोर संकलन हुन छाडेको बिर्तामोडमा फेरी फोहोर संकलन शुरु गरिएको छ । फोहोर व्यवस्थापनका लागि खोलिएको कनकाई बिर्ता अर्जुन (केबीए) नवीकरणीय उर्जा तथा फोहोर मैला व्यवस्थापन कम्पनी लि.ले फोहोरमैला संकलन सुरु गरेको हो ।

यस अघि काठमाण्डौको कागेश्वरी मनहरामा दर्ता रहेको निराकार सरसफाई सेवा प्रालिले उठाउँदै आएको बिर्तामोडको फोहोर केबीएले संकलन सुरु गरेको हो । कनकाई, बिर्तामोड र अर्जुनधारा नगरपालिकाको फोहोरलाई व्यवस्थापन गरी त्यसबाट आर्थिक उपार्जनसमेत गर्ने उद्धेश्यले पालिकाहरुको समेत लगानीमा स्थापित केबीएले आफै फोहोर संकलन सुरु गरेको बिर्तामोड वडा नम्बर ४ का जनप्रतिनिधीसमेत रहेका केबीएका फोकल पर्सन उमेश राउतले जानकारी दिए । सो कम्पनीमा बिर्तामोड नगरपालिकाको २ करोड ५४ लाख, कनकाई नगरपालिकाको २ करोड ३६ लाख ८३ हजार दुई सय र अर्जुनधारा नगरपालिकाको २ करोड ३९ लाख रुपैँया लगानी रहेको छ ।

१६ करोड ६४ लाख लागत अनुमानमा २०७६ वैशाख ७ गते तत्कालिन अर्थमन्त्री युवराज खतिवडाले कनकाई २ सुकेडाँगीमा शिलन्यास गरेको कम्पनीमा विश्व वैंकको ४ करोड ८९ लाख लगानी रहेको छ । सो कम्पनीमा सर्वसाधारणको समेत लगानी रहेको छ ।  

पालिकाहरुकै लगानीमा फोहोर व्यवस्थापनका लागि कम्पनी स्थापना गरेर फोहोर व्यवस्थापनको जिम्मा निजी कम्पनी निराकार सरसफाई सेवा प्रालिलाई दिएको भन्दै बिर्तामोड नगरपालिकाको आलोचना भइरहेको थियो । तत्कालिन बिर्तामोड नगरप्रमुख ध्रुवकुमार शिवाकोटीले २०७८ जेठ ३१ गते निराकारका प्रतिनिधी रविन भट्टराईसँग ३ बर्षका लागि सम्झौता गरेको थियो । सम्झौतामा फोहोर व्यवस्थापनका लागि फोहोर फ्याँक्ने ल्याण्डफिल्ड साइड पालिकाले व्यवस्थापन गर्नुपर्ने र संकलन र ढुवानीको काम मात्र निराकारले गर्ने उल्लेख थियो । पछिल्लो समय पालिकाले ल्याण्डफिल्ड साइड व्यवस्थापन गर्न कठिनाई भोगिरहेको थियो । बिर्तामोड नगरपालिका वडा नम्बर ६ का वडाध्यक्ष सूर्य कन्दङ्वाको संयोजकत्वमा पालिकाले समिति नै गठन गरेपनि समितिले जग्गा व्यवस्थापन गर्न सकिरहेको थिएन ।

केबिएले कुहिने र नकुहिने फोहोर छुट्याएर उठाउने गरेको फोकल पर्सन राउतले बताए । ‘हामीले स्रोतबाट नै कुहिने र नकुहिने फोहोर छुट्याएर लैजाने भएकाले सोहि अनुसार छुट्याएर राख्न हामी अनुरोध गर्दछौँ,’ उनले भने । कुहिने र नकुहिने फोहोर ढुवानी गर्न अलग अलग गाडीको प्रयोग गरिरहेको उनले जानकारी दिए । बिर्तामोडमा केहि समयदेखि धेरै फोहोर संकलन भएर दुर्गन्धित बन्ने अवस्था आएकोले भोलिदेखि ढुवानीका साधन बढाउने उनले बताए । बिर्तामोडसँगै कनकाईको समेत गत विहीबारदेखि केबीएले फोहोर संकलनको कार्य सुरु गरेको राउतको भनाई छ ।

ल्याण्डफिल्ड साइट व्यवस्थापनमा कठिनाई भएपछि फोहोर केबीएले संकलन सुरु गरेको बिर्तामोड नगरपालिकाका उपप्रमुख नगेन्द्रप्रसाद संग्रौलाले जानकारी दिए । निराकारले सेवाग्राहीबाट शुल्क उठाइसकेकाले हाललाई निराकारसँगै मिलेर केबीएले फोहोर संकलन गर्ने उनले बताए । लामो समयदेखि उठ्न बाँकी फोहोर संकलन सुरु भएकाले केहिदिन भित्रै उठिसक्ने र नियमित फोहोर संकलन हुने उनले बताए ।