बिर्तामोड । झापामा बढ्दो लागूऔषध दुर्व्यसनी विरुद्ध ‘लागूऔषध विरुद्ध झापा अभियान’को शुभारम्भ गरिँदै छ । जिल्ला प्रहरी कार्यालय झापाले बिर्तामोड नगरपालिकाको सहयोगमा असार ६ गते शनिबार कार्यक्रमको शुभारम्भ गर्न लागेको हो ।

झापाको बिर्तामोडस्थित सिटी सेन्टरको हलमा शनिबार १ः३० बजे कार्यक्रमको शुभारम्भ गर्न लागिएको जिल्ला प्रहरी कार्यालय झापाकी प्रमुख प्रहरी उपरीक्षक वसुन्धरा खड्काले जानकारी दिइन् । दैनिक रुपमा लागूऔषध कारोबार र सेवनमा संलग्नहरुलाई प्रहरीले पक्राउ गरेपनि पक्राउ पर्नेको संख्या दिनानुदिन बढिरहेकाले यसको न्यूनीकरण तथा जनचेतना फैल्याउने उद्धेश्यले अभियान नै शुरु गर्न लागिएको हो ।

कार्यक्रमको उद्घाटन नेपाल प्रहरीका प्रमुख प्रहरी महानिरीक्षक दानबहादुर कार्कीले गर्नेछन् । कार्यक्रमका पालिकाका प्रतिनिधीहरु, विभिन्न सरोकारवाला संघसंस्थाहरुलाई आमन्त्रण गरिएको छ ।