बिर्तामोड । झापाको गौरादहमा टिपरको ठक्करबाट एक जना वृद्धको मृत्यु भएको छ । टिपको ठक्करबाट गौरादह–४ बस्ने ६१ वर्षीय प्रेमप्रसाद गुरागाईको मृत्यु भएको हो ।

गएराति ८:२० बजे गौरादह–१ नवदुर्गा पेट्रोल पम्पस्थित पाडाजुँगी–गौरीगञ्ज भित्री सडक खण्डमा डिपुचोकबाट पेट्रोल पम्पतर्फ जाँदै गरेको प्र=१–०१–००१ क ११८८ नम्बरको टिपरले साइकल यात्री गुरागाईलाई ठक्कर दिएको थियो । टाउको र शरीरको बिभिन्न भागमा चोट लागेका गम्भीर घाइते गुरागाईलाई उपचारको लागि दमक अस्पताल दमक पठाइएकोमा उपचारको क्रममा राति ८:४५ बजे डाक्टरले मृत घोषणा गरेका थिए ।

टिपर चालक गौरादह–१ बस्ने ३५ वर्षीय उमेश ताजपुरीया र टिपर नियन्त्रणमा लिएको जिल्ला प्रहरी कार्यालयका सूचना अधिकारी डीएसपी रञ्जन अवाले जानकारी दिए ।