बिर्तामोड । नेपालका प्रधानमन्त्री बालेन्द्र शाह (बालेन)लाई अमेरिकाबाट प्रकाशन हुने टाइम म्यागेजिनले विश्वको १०० प्रभावशालीको सूचीमा समावेश गरेको छ । टाइमले बुधबार प्रकाशन गरेको बर्ष २०२६ को सूचीमा शाहलाई प्रभावशाली नेतृत्वको तर्फबाट सूचीमा समावेश गरेको हो । सो सूचीमा विभिन्न क्षेत्रको व्यक्तिहरु समावेश छन् ।

उक्त सूचीमा ९६ बर्षीय अमेरिकन श्रमिक नेता डोलोरेस हुएर्टादेखि सबैभन्दा कान्छा ३५ बर्षीय बालेन शाहसम्म समावेश गरिएको छ ।

बालेनलाई किन समेटियो विश्वका प्रभावशाली व्यक्तिको सूचीमा ?

हेर्नुहोस टाइम पत्रिकामा चार्ली क्याम्पबेलले लेखेको नेपाली अनुवाद

‘आफ्नो इमान बेच्नेहरूका लागि पैसा रूखमै फल्छ जस्तो लाग्छ,’ ३५ वर्षीय नेपाली पूर्व हिप–हप कलाकार बालेन्द्र शाहले र्याप गर्छन्, जसलाई मार्च महिनामा हिमाली राष्ट्र नेपालको अहिलेसम्मकै सबैभन्दा कान्छा प्रधानमन्त्रीका रूपमा निर्वाचित गरिएको थियो । उक्त ऐतिहासिक जित शरद ऋतुमा भएको घातक सडक आन्दोलनले थप बल पाएको थियो, जसको नेतृत्व पुरानो, भ्रष्ट र जनताबाट टाढिएको ठानिएको राजनीतिक नेतृत्वलाई हटाउन दृढ संकल्पित ‘जेन–जेड’ पुस्ताले गरेको थियो ।

त्यसै क्रममा उदाएका हुन् शाह, जसलाई सामान्यतया ‘बालेन’ भनेर चिनिन्छ । सिभिल इन्जिनियरिङका स्नातक शाहको गम्भीर मञ्च प्रस्तुति र भ्रष्ट नेताहरूमाथि तीखो आलोचना गर्ने शैलीले चार वर्षअघि उनलाई काठमाडौंको मेयर बनायो—र अहिले उनी ३ करोड नेपाली जनताको नेता बनेका छन् । बालेनको उदय केवल युवापुस्ताको लोकप्रिय लहर मात्र होइन, दक्षिण एसियाको जरा गाडेको वंशवादी राजनीतिप्रति पूर्ण अस्वीकार पनि हो, जसले क्षेत्रीय सत्तासंरचनामा हलचल मच्चाएको छ ।

मेयरका रूपमा बालेनले प्रशासनिक झन्झटलाई चिर्दै फोहोर व्यवस्थापन, शिक्षा र स्वास्थ्य सेवामा सुधार ल्याउन सफल भए। अब सबैको ध्यान यस कुरामा छ कि टुपाक शकुर र ५० सेन्टका समर्थक भनेर चिनिने बालेनले त्यो सफलतालाई राष्ट्रिय स्तरमा रूपान्तरण गर्न सक्छन् कि सक्दैनन् । ‘सबै राजनीतिज्ञ, नयाँ र पुराना, चोर हुन्,’ बालेनले एकपटक सामाजिक सञ्जालमा लेखेका थिए । अब नेपालीहरू आशा गर्नेछन् कि उनले आफैंलाई गलत साबित गरून् ।