बिर्तामोड । झापाको बिर्तामोडबाट प्रहरीले ठूलो मात्रामा राजश्व छलिको सामान बरामद गरेको छ । बिर्तामोड–९ बाट प्रहरीले ती सामान बरामद गरेको हो ।

बुधबार दिउँसो अन्दाजी २ बजे बिर्तामोड–९ धौलापुलमा इलाका प्रहरी कार्यालय बिर्तामोडका प्रहरी निरीक्षक प्रविण श्रेष्ठको नेतृत्वको प्रहरी टोलीले जाँच गर्ने क्रममा बिर्तामोडबाट भद्रपुरतर्फ जाँदै गरेको मे १ च ६८९२, प्र १–०१–००१ च ७५२४ र  मे १ च ४०४५ नम्बरको गाडीमा ठूलो मात्रामा राजश्व छलि गरि लैजाँदै गरेको सामान फेला पारेको जिल्ला प्रहरी कार्यालय झापाका सुचना अधिकारी प्रहरी नायव उपरीक्षक खगेन्द्रबहादुर खड्काले जानकारी दिए ।

ती गाडीबाट प्रहरीले बच्चाको डाइपर ४१ कार्टुन, इन्चान्टर लेखिएको कस्मेटिक सामान १९ कार्टुन, चुलबुल लेखिएको रक्सी २ सय कार्टुन, गोर्खा बियर १५० कार्टुन, ओरियो विस्कुट १६ कार्टुन र सेलो, विकुल लेखिएको खाननेतेल ८० कार्टुन बरामद गरेको प्रहरीले जनाएको छ ।

प्रहरीले ती सामानसँगै गाडी चालकहरु अर्जुनधारा नगरपालिका ११ बस्ने बर्ष ४३ को दिलिप खड्का, अर्जुनधारा ५ बस्ने बर्ष ५४ को राजाराम खड्का  र भद्रपुर १ बस्ने बर्ष ४७ को उदेन राइलाई पक्राउ गरी आवश्यक कारबाहीका लागि राजश्व कार्यालय इटहरीमा बुझाएको प्रहरीले जनाएको छ ।