बिर्तामोड । झापाको कचनकवलमा गुडिरहेको म्याजिक भेनमा आगलागी भएको छ । कचनकवल ६ स्थित लाहुरे चोकमा बनियानीबाट हिमालीतर्फ आउँदै गरेको भेनमा आगलागी भएको हो ।

शनिबार अन्दाजी ४:३० बजे मे १ ज ३२७९ को म्याजिक भेन गुडिरहेको अवस्थामा आगलागी भएको जिल्ला प्रहरी कार्यालय झापाले जनाएको छ । आगलागीबाट भेनका चालक स्थानीय २४ बर्षीय प्रकाश खनालको अनुहार र टाउकोमा सामान्य चोट लागेको र गाडीमा सवार अन्य दुई जना यात्रुलाई केहि नभएको जिप्रका झापाका सुचना अधिकारी डीएसपी खगेन्द्रबहादुर खड्काले जानकारी दिए ।

आगलागीको कारण थाहा नभएको र भेन पूर्णरुपमा क्षति भएको प्रहरीले जनाएको छ ।