बिर्तामोड । जेनजी आन्दोलनका क्रममा भदौ २४ गते इलाका प्रहरी कार्यालय बिर्तामोडका प्रहरी कर्मचारीलाई कुटपिट गर्ने एक जना पक्राउ परेका छन् । बिर्तामोड ५ का २६ बर्षीय नवराज राईलाई प्रहरीले भक्तपुरबाट पक्राउ गरेको हो ।

राईलाई कात्तिक २० गते भक्तपुर प्रहरी परिसरबाट खटिएको प्रहरी टोलीले भक्तपुर एरियाबाट पक्राउ गरेको जिल्ला प्रहरी कार्यालय झापाले जनाएको छ । राईले भदौ २४ गते जेनजी आन्दोलनका क्रममा इप्रका अनारमनीमा कार्यरत प्रहरी हवल्दार बिजय खड्कालाई कुटपिट गरी गम्भीर घाइते बनाइ फरार भएको अभियोग छ ।

पक्राउ परेका राईलाई आवश्यक अनुसन्धानको लागि इप्रका बिर्तामोडमा ल्याई ज्यान मार्ने उद्योग कसुरमा मुद्धा दर्ता गरी जिल्ला अदालत झापाबाट ७ दिन म्याद थप गरी अनुसन्धान भइरहेको जिल्ला प्रहरी कार्यालय झापाका सुचना अधिकारी डीएसपी खगेन्द्रबहादुर खड्काले जानकरी दिए ।