बिर्तामोड । आर्थिक बर्ष शुरु भएको दुई महिना वित्नै लाग्दापनि कोशीका इटहरी, धरानसहित ५ स्थानीय तहले हालसम्मपनि बजेट प्रस्तुत गर्न सकेका छैनन् । हरेक वर्ष असार १० भित्र बजेट सार्वजनिक गर्नुपर्ने प्रावधान भएपनि कोशीका ५ स्थानीयतहले चालु आर्थिक वर्षको बजेट अहिलेसम्म प्रस्तुत गर्न नसकेका हुन् ।

कोशी प्रदेशमा भोजपुरको साल्पासिलिछो गाउँपालिका, इटहरी र धरान उपमहानगरपालिका, मोरङको सुनवर्षी नगरपालिका र ओखलढुङ्गाको सुनकोशी गाउँपालिकाले बजेट पेस गरेका छैनन् ।

सङ्घीय मामिला तथा सामान्य प्रशासन मन्त्रालयका अनुसार हालसम्म ६९२ स्थानीयतहले बजेट प्रस्तुत गरी कार्यान्वयनमा ल्याइसकेका छन् । तर राजनीतिक विवाद र स्थानीय स्तरका समस्या देखाउँदै कोशीका ५सहित ६१ स्थानीय तहले अझै बजेट सार्वजनिक गरेका छैनन् ।

कोशी प्रदेशका पाँच, मधेस प्रदेशका ४० र वाग्मती प्रदेशका पाँच स्थानीयतहले बजेट ल्याएका छैनन्। गण्डकी प्रदेशका सबै स्थानीयतहले बजेट सार्वजनिक गरेका छन् भने लुम्बिनीका सात, कर्णालीका तीन र सुदूरपश्चिमको एक स्थानीयतह अझै बजेटविहीन छन् ।