बिर्तामोड । पूर्वी नाका काँकरभिट्टाबाट ७४ करोड ८३ लाख ३२ हजारको पेट्रोलियम पदार्थ आयात भएको छ । चालु आर्थिक बर्षको साउन महिनामा उक्त मूल्य बराबरको पेट्रोलियम पदार्थ आयात भएको हो । यो अघिल्लो आवको सो अवधिको तुलानामा ११.८ प्रतिशतले बढी हो ।

अघिल्लो आवको सोहि अवधिमा ६६ करोड ९२ लाख ७९ हजारको पेट्रोलियम पदार्थ आयात भएको थियो ।

मेची भन्सार कार्यालयका अनुसार राजश्व संकलनका आधारमा आयात भएका मुख्य १० वस्तुहरुमा पेट्रोलियम पदार्थ भन्दा दोस्रो बढी मुल्यको वस्तु आयात हुनेको सूचीमा यातायातका साधन र तिनका पर्टपूर्जा रहेको छ । साउन महिनामा ४ करोड २१ लाख ३७ हजार मुल्यका ती सामाग्री आयात भएको मेची भन्सार कार्यालयले जनाएको छ ।

अन्य वस्तुहरुमा ३ करोड ५ लाख ४३ हजारको खनिज उत्पादन, २ करोड ५८ लाखका जुत्ता तथा चप्पलहरु, २ करोड ८ लाख ४६ हजारका श्रृंगारका सामान, १ कराड ९९ लाख ८६ हजारको कफि आयात भएको कार्यालयले जनाएको छ ।

त्यस्तै प्लाष्टिकका कच्चा पदार्थ १ करोड ९१ लाख ३८ हजार, प्लाष्टिकका सामानहरु १ करोड ९० लाख ६१ हजार, फलफुल १ करोड ७४ लाख ९७ हजार र तरकारी १ करोड ७० लाख २५ हजारको आयात भएको छ ।