झापा । काभा महिला भलिबल नेसन्स लिगको आज फाइनल खेल हुँदैछ। उपाधिका लागि नेपाल र भारत भिड्दैछन् ।

नेपाली भलिबल टोलीकी कप्तान अरुणा शाहीले फाइनलमा भारतसँग आफ्नो टिमले झनै राम्रो खेल्ने विश्वास व्यक्त गरेकी छन् । इरानमाथि सोझो सेटमा जित निकालेपछि पत्रकार सम्मेलनमा कप्तान अरुणाले छिमेकी राष्ट्र भारतसँग जस्तोसुकै अवस्थामा पनि नेपालले राम्रो खेल्दै आएको स्मरण गर्दै सोही मानसिकता र प्रदर्शन दोहोरिने विश्वास व्यक्त गरेकी थिइन् ।

कप्तान अरुणाले इरान जस्तै भारतलाई पनि फाइनलमा हराउँदै उपाधि जित्ने लक्ष्य रहेको बताएकी हुन् । इरानलाई सुरुदेखि नै दबाबमा राखेर खेल्नुपर्छ भन्ने उद्देश्य सहित कोर्टमा उत्रनु नै जितको बलियो आधार रहेको अरुणाले बताइन्। पछाडि परेको अवस्थामा पनि सोही मानसिकताका साथ खेल्दा पुनरागमनसँगै जित सम्भव भएको उनको भनाइ छ।