बिर्तामोड । झापाको दमकमा खुल्ला पुरुष तथा महिला दौड प्रतियोगिता आयोजना हुने भएको छ । मानवहित संरक्षणमञ्च नेपालको आयोजनामा असार २१ गते प्रतियोगिता हुन लागेको हो ।

स्वास्थ्य, भातृत्व र पर्यटन प्रबर्द्धनका लागि खेलकुद भन्ने मुल नारालाई आत्मसाथ गर्दै दौड प्रतियोगिता आयोजना लागिएको प्रतियोगिता संयोजक समुन्द्रा लामाले जानकारी दिइन् । प्रतियोगितालाई खुल्ला र स्थानीय गरी दुई किसिमबाट आयोजना गर्न लागिएको उनले बताइन् ।

खुल्ला दौडका लागि १० र स्थानीय दौडका लागि ५ किलोमिटरको दुरी तय गरिएको आयोजकले जनाएको छ । खुल्ला दौडका लागि विदेशीले समेत भाग लिन सक्ने तर स्थानीय दौडका लागि कमल र दमकको स्थानीय तथा विद्यार्थीका लागि सो क्षेत्रको विद्यालयमा अध्ययन गरेको हुनुपर्ने इभेन्ट डाइरेक्टर लोकप्रसाद ओलीले जानकारी दिए ।

खुल्ला प्रतियोगिताको छैठौँ स्थानसम्मका विजेताले क्रमशः ५०,२५,१५,५,३ र २ हजार नगद पुरस्कार प्राप्त गर्ने संयोजक लामाले जानकारी दिइन् । लामाका अनुसार स्थानीय दौडका विजेताले प्रथमदेखि पाचौँसम्म क्रमशः १५,१०,५,२ र १ हजार नगद पुरस्कार प्राप्त गर्नेछन् ।

असार २१ गते विहान ७ बजे विहान दमकको भाटभटेनीबाट शुरु भएर आदिवासी रंगशालामा कार्यक्रम समापन हुने आयोजकले जनाएको छ ।

मञ्चले अखिल नेपाल खेलकुद महासंघसँगको सहकार्यमा कार्यक्रम आयोजना गर्न लागेको हो ।