बिर्तामोड । झापाको हल्दिवारी गाउँपालिकामा दुई दिने महिला अधिकार र विद्यमान कानून सम्बन्धी कार्यशाला शुरु भएको छ । हल्दिवारी गाउँपालिकाको सहयोगमा टाइम्स मिडिया नेटवर्क बिर्तामोडले कार्यशाला आयोजना गरेको हो ।

हल्दिवारी गाउँपालिकाको ५ वटै वडाबाट महिला जनप्रतिनिधि, अगुवा महिलाहरु र विधार्थीको सहभागितामा सोमबारबाट कार्यशाला शुरु भएको छ । पहिलो दिन आज वडा नम्बर १ र २ को सहभागिता रहेको थियो भने बाँकी वडाहरुबाट मंगलवार सहभागिता हुने कार्यक्रम संयोजक प्रदिप परियारले बताए ।

कार्यशालाको पहिलो दिन अधिवक्ता हेमकला कट्टेलले सहजीकरण गरेकी थिइन् । मंगलवारको सहजीकरण अधिवक्ता विष्णु कुमारी तामाङले गर्ने परियारले जानकारी दिए ।

टाइम्स मिडियाका अध्यक्ष नारायण प्रसाद पोखरेलको अध्यक्षतामा भएको कार्यशालामा गाउँपालिका उपाध्यक्ष लक्ष्मी देवी मैनाली, प्रमुख प्रशासकीय अधिकृत प्रविण दाहाल, कार्यपालिका सदस्य शान्ता शिवाकोटीले शुभकामना मन्तव्य राखेका थिए ।

कार्यक्रममा आशिका मावो र अनुष्का शिवाले कार्यक्रममा प्रतिवेदन पेश गरेका थिए । सहजकर्ता अधिवक्ता कट्टेलले सहभागीहरुलाई समूहमा विभागन गरेर महिलाका सवालमा छलफल चलाएकी थिइन् । छलफलमा महिला अधिकारको आवश्यकता बारे चर्चा गरिएको थियो ।