बेलबारी । मोरङको बेलबारी नगरपालिका–१० स्थित बेलबारी–चिसाङ सामुदायिक वन उपभोक्ता समितिका एक जना कर्मचारी मृत फेला परेका छन् । 

वन उपभोक्ता समितिका (हेरालु) ६९ वर्षीय यादव खनाल मृत भेटिएको मोरङ प्रहरीका प्रवक्ता डिएसपी दीपक श्रेष्ठले बताए । उनका अनुसार वन उपभोक्ता समितिको काठ थोपरेर राखेको घाटगद्धीको कम्पाउण्डमा सोमबार दिउँसो २ बजेतिर खनालको शव घोप्टो परेको अवस्थामा फेला परेको हो । मृतक खनाल ५ वर्षदेखि हेरालुको रूपमा कार्यरत थिए ।

प्रहरीका अनुसार मृतक खनाल बिहान ७ बजेतिर घरबाट निस्किएको र खाना खानलाई नआएपछि खोजी गर्ने क्रममा परिवारका सदस्यले मृत फेला पारेका थिए । शव पोस्टमार्टमका लागि धरानस्थित वीपि कोइराला स्वास्थ्य विज्ञान प्रतिष्ठान लगिएको छ ।

घटनाका बारेमा अनुसन्धान थालिएको प्रहरीले जनाएको छ ।