बिर्तामोड । मादक पदार्थ सेवन गरेर सवारी चलाउने चालकले सचेतना कक्षा लिनु पर्ने भएको छ । झापामा सवारी साधन दुर्घटना न्यूनीकरणका लागि मादक पदार्थ सेवन गरेका चालकले अनिवार्य सचेतना कक्षा लिनु पर्ने भएको हो ।

मादक पदार्थ सेवन गरेका चालकका कारण हुने सवारी साधन दुर्घटना न्यूनीकरण गर्नका लागि जिल्ला ट्राफिक प्रहरी कार्यालय झापाले अनिवार्य  दुर्घटना सम्बन्धि सचेतना कक्षा दिन लागेको हो । श्रव्य र दृष्य सामाग्री समेटिएको सचेतना कक्षा ३० मिनेटको हुने जिल्ला ट्राफिक प्रहरी कार्यालय झापाका सहायक प्रहरी निरीक्षक यामकुमार खड्काले जानकारी दिए ।

ट्राफिक जाँचको समयमा चालकले मादक पदार्थ सेवन गरेको पाइएमा लाइसेन्स तथा व्लुबुक नियन्त्रणमा लिने र दैनिक १० बजेदेखि सञ्चालन हुने सचेतना कक्षामा चालकलाई सहभागी गराउने उनले बताए । सचेतना कक्षा लिएपछि राजश्व तिराएर मात्र चालकलाई छाड्ने उनले बताए ।

चालकले अत्यधिक मात्रामा मादक पदार्थ सेवन गरेको पाइएमा सो दिन थुनामा राखेर भोलि पल्टमात्र सचेतना कक्षामा सहभागी गराइने बताइएको छ । चालकले मादक पदार्थ सेवन गरेर सवारी साधन चलाएका कारण भएका थुप्रै दुर्घटनामा परी मानवीय क्षति भएपछि दुर्घटना न्यूनिकरणमा ट्राफिक प्रहरीले थप सक्रियता बढाएको छ ।