कविता
मेरो वर्तमान
भित्ताभरको आलो घाउ सहँदै
पीडादायक वर्तमान झेल्दै छु
केमोको असह्य बेदना सहँदै
यहाँ आफूलाई भुल्याउँदै छु ।
आफन्त अनि परिवारलाई
ऐय्या ऐय्या लुकाउँदै
मुस्किलले चोट सहँदै
ठीकै छु भन्दै हाँसेकी छु ।
स्वाद नै नपाउने खानालाई
मीठो मानेर खाँदै छु
निद्रा कहाँ पर्छ र आनन्दले
निदाएको बहाना गरिरहेछु ।
यो रोगसँग भेट भए सँगै
दिनरात दुःखमा डुबेको छु
तन र मनको सन्तुलन मिलाउन
जीवन प्रतिको सोँच बदलेको छु ।
सुख र खुशी मेरो देखेर
जलन भएछ यस रोगलाई
बलवान् ठान्ने क्यान्सर जित्न
योग र प्राणायाम गर्दै छु ।
परिवार, आफन्त र अग्रजहरूको
माया सद्भाव र आशिर्वादले
सुनौलो बिहानीको पर्खाइमा
आफ्नो आत्मबल बढाउँदै छु ।
भगवान समान छन् डाक्टर मेरा
श्रद्धाले शिर झुकाउँदै छु
चाँडै कर्मथलो फर्केर जाने
प्रण प्रतिज्ञा गर्दैछु ।
-प्रतिमा चापागाईं
मेचीनगर न.पा. ८, झापा