बिर्तामोड । भोलि हुने मतदानका लागि धमाधम तयारी भइरहेको छ । मतदानका लागि मतदान स्थलमा बुथ राख्ने, त्रिपाल लगाउने काम भइरहेको हो ।

बिर्तामोडमा १८ वटा मतदान स्थलमा ६४ मतदान केन्द्र रहेका छन् । ती स्थानहरुमा बुथ राख्ने ठाउँ, मतदातालाई व्यवस्थित गर्न लाइन लाग्ने ठाउँ साथै बर्षातबाट मतपत्र सुरक्षित राख्न पाल लगाउने काम भइरहेको बिर्तामोड नगरपालिकाका निर्वाचन अधिकृत डम्बरप्रसाद काफ्लेले जानकारी दिए । बिर्तामोडको ६४ वटै मतदान केन्द्रमा ७०० जनाभन्दा बढीका दरले मतदाता रहेकाले प्रत्येक निर्वाचन अधिकृतले तीन जना स्वयम् सेवक राख्न पाउने व्यवस्था रहेको उनले बताए ।

मतदान केन्द्रहरुबाट हिजैदेखि मतदाता परिचय पत्र वितरण भइरहेको छ । यस पटक निर्वाचन आयोगले मतदान केन्द्रबाट नै मतदाता शिक्षा दिने भनेपनि प्रभावकारी भएको छैन । बिर्तामोड नगरपालिकाको मत गणनाका लागि पालिकाको सभा हलमा व्यवस्था गरिएको छ ।

बिर्तामोडमा २८,५२६ पुरुष, २८,८८१ महिला र २ अन्य मतदाता रहेका छन् । बिर्तामोडको १० वटा वडामा ५२ जना जनप्रतिनिधि निर्वाचित हुनेछन् ।