ओलखढुंगा । ओखलढुंगाको मानेभन्ज्याङ गाउँपालिका–६ हर्कपुरस्थित सिद्दिचरण राजमार्गमा सवारी दुर्घटना हुँदा  ३ जना प्रहरीको मृत्यु  भएको छ । दुर्घटनामा परि ६ जना घाईते भएका छन् ।

आज बिहान साँढे ८ बजे जिल्ला प्रहरी कार्यालय सोलुखुम्बुबाट प्रदेश प्रहरी कार्यालय बिराटनगर आउदै गरेको बा.१७ च १०९४ को डबल क्याप बोलेरो गाडी सडकबाट १५० मिटर तल खसेको प्रदेश प्रहरी कार्यालय विराटनगरले जनाएको छ । दुर्घटनामा परि प्रहरी हवल्दार भुपेन्द्र कार्की र प्रहरी जवान मानिक राजवंशीको घटनास्थलमा नै मृत्यु भएको थियो भने प्रहरी जवान रुपन बिष्टको उपचारको क्रममा नेपाल प्रहरी अस्पताल काठमाण्डौमा मृत्यु भएको प्रहरीले जनाएको छ ।

उक्त दुर्घटनामा घाईते भएका प्रहरी निरीक्षक रिषिराज ढकाल, प्रहरी सहायक निरिक्षक नवराज दाहाल, प्रहरी बरिष्ठ हवल्दार बिशाल श्रेष्ठ, भुपेन्द्र खनाल र चालक लिला प्रसाद खनाललाई स्थानीय मेडिकलमा उपचार पश्चात थप उपचारको लागि नेपाली सेनाको हेलिकप्टरबाट काठमाण्डौ लगिएको छ । प्रहरी नायब निरीक्षक धनराज खतिवडा स्थानीय मेडिकलमा उपचार पश्चात डिस्चार्ज भएका छन् ।  घटना सम्बन्धमा थप अनुसन्धान भईरहेको प्रहरीले जनाएकोछ ।