बिर्तामोड । प्रहरीले बैंकिङ कसुरमा फरार रहेका प्रतिवादीलाई पक्राउ गरेको छ । प्रहरीले चौध महिनादेखि फरार रहेका झापा बाह्रदशी गाउँपालिका २ का ४२ बर्षीय नरप्रसाद पनेरुलाई पक्राउ गरेको हो ।
सम्मानित उच्च अदालत पाटनको मिति २०७७ माघ २० गतेको फैसला अनुसार बैंकिङ कसुर मुद्दामा पनेरुलाई दोषी ठहर गरेको थियो । अदालतले पनेरुलाई दुई दिन कैद र तीन लाख ८७ हजार रुपैयाँ जरिवाना हुने फैसला गरेको जिल्ला प्रहरी कार्यालय झापाका सुचना अधिकारी वसन्त पाठकले जानकारी दिए ।
पक्राउ परेका पनेरुलाई चैत्र ५ गते जिल्ला अदालत भद्रपुरमा उपस्थित गराइएको र पीसीआर रिपोर्ट नेगेटिभ आएपश्चात कारागार कार्यालय चन्द्रगढी पठाइने उनले जानकारी दिए ।