बिर्तामोड । झापा बिर्तामोड–४ का शिक्षासेवी गणेशप्रसाद खनाल तथा बुध खनालले नेपाल पत्रकार महासंघ झापा शाखाले स्थापना गरेको पत्रकार सहारा उपचार कोषलाई एकलाख एक हजार रुपैयाँ प्रदान गर्ने घोषणा गरेका छन् । आफ्नो विवाहको ६० औं वर्षगाँठको अवसरमा खनाल दम्पत्तिले मंगलबार उक्त घोषणा गरेका हुन् ।

२०१७ साल फागुन २४ गते बुध भट्टराईसँग वैवाहिक सम्वन्धमा जोडिएका खनालले ३२ वर्षे निजामती सेवाबाट अवकास लिएपछि ०५३ सालमा गोमेन्द्र बहुमुखी महाविद्यालयको स्थापना गरेका थिए । उनका तीन छोरा दीपक अष्ट्रेलिया तथा रुपक र उत्तम बिर्तामोडमा अलग अलग शिक्षण संस्थाका सञ्चालक छन् ।

खनालले विवाहउत्सवमा परोपकारी काम गरौं भन्ने भावनाले  पत्रकारको दिगोे हितमा योगदान गर्न र अरुलाई पनि सहयोगका लागि प्रेरित गर्न सहयोग गर्न लागेकोे बताए ।