बिर्तामोड । मनमोहन प्राविधिक विश्वविद्यालयले झापाका सञ्चारकर्मीसँग अन्तरक्रिया सम्पन्न गरेको छ । विहिबार झापाको बिर्तामोडमा मुलुककै पहिलो प्राविधिक विश्वविद्यालय मनमोहनले अन्तरक्रिया गरेको हो । कार्यक्रममा विश्वविद्यालय स्थापनाको उद्धेश्य, कार्यक्रम र भावी योजनाको बारेमा जानकारी दिइएको थियो ।

मुलुकमै पहिलो पटक प्रदेश १ सरकारले स्वायत्त कानुन निर्माण गरेर विश्वविद्यालयको स्थापना गरेको हो । प्राविधिक शिक्षालाई गुणस्तरीय, वैज्ञानिक तथा जीवन उपयोगी बनाउने उद्धेश्यले मोरङको बुढीगंगा–४ मोरङमा मनमोहन प्राविधिक विश्वविद्यालय स्कुल अफ इन्जिनियरिङको स्थापना भएको विश्वविद्यालयका डीन डा. प्रचण्डमान प्रधानले जानकारी दिए । पूर्वाधारको विकास नभई अन्य विकास नहुने भन्दै डीन प्रधानले अबको आवश्यक्ता प्राविधिक शिक्षाको भएको र इञ्जिनियरिङ विषयको माग रहेको बताए । युवालाई प्राविधिक शिक्षा तर्फ अग्रसर गराउँदै शिक्षालाई श्रमसँग, श्रमलाई उत्पादनसँग र उत्पादनलाई बजारसँग जोड्नुपर्ने वर्तमान आवश्यकता परिपूर्तिका लागि विश्वविद्यालयको स्थापना भएको प्रधानको भनाई छ ।

विश्वविद्यालयले स्कुल अफ इञ्जिनियरिङ अन्तर्गत स्नातक तहको सिभिल इञ्जिनियरिङ र इलेक्ट्रिकल एण्ड इलेक्ट्रोनिक्स इञ्जिनियरिङमा भर्ना खुलाएको प्रधानले जानकारी दिए । प्रत्येक फ्याकल्टीमा ४८ जनाको सिट स्वीकृति लिइएको भएपनि यो बर्ष २४ कोटामा भर्ना लिइने उनले बताए ।

पर्याप्त भौतिक संरचना र गुणस्तरीयतामा जोड नै विश्वविद्यालयको पहिचान रहेको बताइएको छ । न्यून शुल्कमा गुणस्तरीय शिक्षा दिन विश्वविद्यालय लागि परेको इलेक्ट्रिकल एण्ड इलेक्ट्रोनिक्स विभागका कार्यक्रम संयोजक इञ्जिनियर नरेन्द्रकुमार डाँगीले बताए ।

विश्वविद्यालयले प्रदेश १ का लागि मात्र महिला १, लक्षित वर्ग २ र दलित वर्ग १ गरी ४ ओटा कोटा छुट्याएको छ । प्रदेश १ सरकारको अनुदानबाट विश्वविद्यालय सञ्चालन हुने भएकाले प्रदेश १ कै जनतालाई लाभ पुर्याउन कोटा छुट्याइएको सिभिल इञ्जिनियरिङ विभागका कार्यक्रम संयोजक डाक्टर दिप रञ्जन डंगोलले बताए । डंगोलका अनुसार २४ सिटमध्ये विभिन्न कोटासहित १५ कोटा आरक्षित र ९ कोटा खुल्लाका लागि रहेको छ ।

विश्वविद्यालयले ४ बर्षे स्नातक तह अन्तर्गत सिभिल इञ्जिनियरिङमा नेपाली विद्यार्थीका लागि ५ लाख ८० हजार, विदेशीका लागि ८ लाख उनान्चास हजार आठ सय र इलेक्ट्रिकल एण्ड इलेक्ट्रोनिक्स इञ्जिनियरिङमा नेपालीका लागि ५ लाख ७० हजार र विदेशी विद्यार्थीका लागि ८ लाख उनान्चालिस हजार आठ सय रुपैँया शुल्क तोकेको छ । ३० जना महिला विद्यार्थीका लागि होस्टेल क्षमता रहेको र प्रति महिना आवास शुल्क ६ सय रुपैँया तोकिएको छ ।

आगामी चैत्र २ गतेसम्म भर्नाका लागि आवेदन खुल्ला गरिएको र विलम्ब शुल्क तिरेर थप ७ दिन भित्रमा आवेदन दिन सकिने छ ।

विश्वविद्यालयले हाल स्कुल अफ इञ्जिनियरिङ सञ्चालन गर्न लागेको भएपनि भविष्यमा स्कुल एप्लाइड साइन्स एण्ड टेक्नोलोजी र स्कुल अफ मेडिसिन एण्ड एप्लाइड हेल्थ साइन्सेज सञ्चालन गर्ने योजना रहेको डीन प्रधानले जानकारी दिए । विश्वविद्यालयले दश बर्षे कार्य योजना अन्तर्गत तीन वटा स्कुल अन्तर्गत स्नातक, स्नातकोत्तर र विद्यावारिधी गरी २८ वटा बिषयहरु सञ्चालन गरी २ हजार ८ सय ३१ जना विद्यार्थी उत्पादन गर्ने लक्ष्य राखेको छ ।

प्रदेश १ सरकारले प्रदेशसभाबाट स्वायत्त कानुन निर्माण गरी २०७६ असोज १६ गते प्रदेश राजपत्रमा सूचना प्रकाशन गरी विश्वविद्यालयको स्थापना गरेको कानूनी सल्लाहकार कोषराज न्यौपानेले जानकारी दिए । दुई बर्षअघि नै कानून निर्माण भएको भएपनि थुप्रै नियमावली र निर्देशिका बनाउनु पर्ने भएकाले सञ्चालनका लागि समय लागेको उनले बताए ।