बिर्तामोड । अर्जुनधारा नगरपालिकाले जग्गा दातालाई सम्मान शुरु गरेको छ । पालिकाले विभिन्न समयमा पालिकाभित्रका विभिन्न कार्यालयलाई जग्गा उपलब्ध गराउने दातालाई सम्मान शुरु गरेको हो । 

अर्जुनधारा नगरपालिका १ नम्बर वडा कार्यालय र स्वास्थ्य केन्द्रको भवन निर्माणका लागि निशुल्क जग्गा उलपब्ध गराउने तीन जनालाई सम्मान–पत्र सहित सम्मान गरिएको नगर प्रमुख हरिकुमार रानाले जानकारी दिए । कार्यक्रमका प्रमुख अतिथी पूर्वमन्त्री वीरमणि ढकालले जग्गादातालाई सम्मान गरेका थिए ।

वडा कार्यालय र स्वास्थ्य केन्द्र निर्माणका लागि जग्गा उपलब्ध गराउने स्थानीय नरमाया खड्का, हेमबहादुर न्यौपाने र मनबहादुर फुँयालले जग्गाा उपलब्ध गराएका थिए । खड्काले डेढ कठ्ठा, न्यौपानेले ३ कठ्ठा ११ धुर जग्गा वडा कार्यालय निर्माणका लागि उपलब्ध गराएका थिए भने स्वास्थ्य केन्द्र निर्माणका लागि फुँयालले २ कठ्ठा जग्गा उपलब्ध गराएका थिए ।

त्यस्तै, नगरपालिकाले अर्जुनधारा नगरपालिका २ नम्बर वडा कार्यालयका जग्गा दाताहरु रोमबहादुर पुलामी मगर, पदमबहादुर पुलामी मगर र नैन्सिंह मगरलाई समेत सम्मान गरेको छ । रोमबहादुर र पदमबहादुरले ३ कठ्ठा र नैनसिंहले १ कठ्ठा ५ धुर जग्गा उपलब्ध गराएका थिए ।

सोहि कार्यक्रममा आधारभूत स्वास्थ्य केन्द्र साठीमुरेका जग्गादाताहरु मानबहादुर समाल, रोम समाल मगर, रत्नबहादुर समाल मगर, अनिल समाल मगर, अमर समाल मगर, अशोक समाल मगर, फेनकुमारी समाल मगरलाई सम्मान गरिएको थियो । केन्द्रका लागि मानबहादुर समाल मगरले १० धुर, रोम समाल मगरले १० धुर, रत्नबहादुर समाल मगरले १० धुर, अनिल समाल मगरले ५ धुर, अमर समाल मगरले १० धुर, अशोक समाल मगरले ५ धुर, फेनकुमारी समाल मगरले १० धुर, अशोककुमार समाल मगरले १० धुर जग्गा उपलब्ध गराएका थिए । सहकाले खोप केन्द्र निर्माणका लागि १ कठ्ठा जग्गा उपलब्ध गराउने धनबहादुर बस्नेतलाई समेत सम्मान गरिएको नगरपालिकाका प्रेस संयोजक नन्दु खतिवडाले जानकारी दिए ।

नगरपालिकाले खुदुनाबारी गाउँ पञ्चायतका लागि जग्गा दिने खड्ग बिक्रम नेम्वाङ (डबल सुब्बा) लाई मरणोपरान्त सम्मान गरिएको छ । डब्बल सुब्बाका अन्तरे छोरा खगेन्द्र बिक्रम नेम्वाङको हातमा मरणोपरन्त सम्मानपत्र र दोसल्ला ओढाएर सम्मान गरिएको खतिवडाले जानकारी दिए । डब्बल सुब्बाले २०४० सालमा खुदुनाबारी गाउँ पञ्चायतका लागि १० कठ्ठा जग्गा प्रदान गरेका थिए ।

उनीसँगै स्वास्थ्य चौकीलाई जग्गा दिने दानेन्द्र बिक्रम नेम्वाङ, मकेन्द्र विक्रम नेम्वाङ, स्व. शेरबहादुर जवेगु, महेन्द्र जवेगु (लुकेन्द्र), स्व. भक्तबहादुर चौहान, रीताकला चौहान र शहरी स्वास्थ्य केन्द्रलाई जग्गा दिने सरस्वती राईलाई समेत सम्मानपत्र र दोसल्ला ओढाई सम्मान गरिएको थियो ।

सम्मान कार्यक्रम नगर प्रमख हरिकुमार रानाको अध्यक्षतामा भएको थियो । अन्य वडाका जग्गादाताहरुलाई समेत क्रमश सम्मान गरिने बताइएको छ ।