बिर्तामोड । झापा बिर्तामोडस्थित करोडौँको जग्गा किर्ते काण्डका आरोपीद्वय गौरादह ७ का वडाध्यक्ष बलराम खरेल र मालपोत कार्यालय झापाका अधिकृत चेतन अधिकारीले आत्मसमर्पण गरेका छन् । अधिकारीले वुधबार र खरेलले विहिबार इलाका प्रहरी कार्यालय अनारमनीमा आत्मसमर्पण गरेका हुन् ।

विर्तामोडको पश्चिम बसपार्क छेउको स्वर्गीय टुङ्गबहादुर बस्नेतको नाममा रहेको जग्गा अधिकृत वारेसनामा नै किर्ते बनाएर जग्गा बिक्री गरेको आरोप लागेका अधिकारी र खरेल फरार रहेका थिए ।

आरोपीद्वय खरेल र अधिकारीलाई नियन्त्रणमा लिएर अनुसन्धान भइरहेको इलाका प्रहरी कार्यालय अनारमनीका प्रमुख सन्तोष आचार्यले बताए । अन्य १० जना आरोपीलाई प्रहरीले गत वैशाख ९ गते पक्राउ गरी सार्वजनिक  गरेको थियो भने खरेल र अधिकारीसहित अन्य ६ जना पक्राउ पर्न सकेका थिएनन् । उनीहरुलाई ठगी, सरकारी छाप किर्ते, आपराधिक लाभ तथा संगठित अपराध मुद्धामा अनुसन्धान भईरहेको प्रहरीले जनाएको छ ।

प्रहरीका अनुसार खरेल बिर्तामोड नगरपालिकाबाट मालपोत तिरेको रसिद लगायत किर्ते कागजात बनाउने कार्यमा संलग्न रहेको, गिरोहसँगै वारेस लिन काठमाण्डौ गएको र समन्वयात्मक कार्य गरेको साथै अधिकृत अधिकारीलाई पदीय अख्तियारको दुरुपयोग गरेको आरोप छ । 

उनीहरुले बस्नेतको नाममा रहेको कित्ता नं. ४१८३ को १ कठ्ठा १३.७५ धुर जग्गा किर्ते कागजात तयार गरी बिक्री गरेका थिए । यस अघि प्रहरीले बाह्रदशी ३ घर भई विर्तामोड २ बस्दै आएका ३९ वर्षीय मंगलसिंह राजवंशी, नापीका पूर्व कर्मचारी भद्रपुर ७ का ५२ वर्षीय नविन कोइराला, जग्गा कारोवारी बाह्रदशी ५ का ५० वर्षीय लिलाधर राजवंशी, भोजपुर घर भई गौरीगञ्ज बस्ने बलराम विश्वकर्मा, विधुत प्राधिकरण फिक्कलका कर्मचारी शिवसताक्षी ८ का भुपदेव कटुवाल, अर्जुनधारा ५ का लेखनाथ खनाल, दोभान कन्स्ट्रक्सनका सञ्चालक विर्तामोड ४ का ४३ वर्षीय गोविन्द वान्तावा (मिलन) , विर्तामोड १० घर भई कोटिहोम बस्दै आएका ७१ वर्षीय देवी प्रसाद पाण्डे, विर्तामोड ४ कि ३३ वर्षीया रञ्जु राई र उर्लावारी ४ का ४८ वर्षीय राजन विश्वकर्मालाई पक्राउ गरेको थियो ।

पक्राउ परेकाहरु मध्ये नक्कली टुङ्गबहादुर बनेका देवीप्रसाद पाण्डेको मृत्य भइसकेको छ भने केहि धरौटीमा छुटिसकेका छन् । कारागारमा लेखनाथ खनाल, मंगलसिंह राजवंशी र सुशिल बराइली सजाय भुक्तान गरिरहेको बताइएको छ ।