बिर्तामोड । विहिबार राति झापाको शिवसताक्षी नगरपालिका १० स्थित पर्यटकीय क्षेत्र दोमुखामा आगलागी भएको छ । आगलागीमा परि दुई जना घाइते भएका छन् । 

आगलागीबाट स्थानीय ४३ बर्षीया लक्ष्मी भण्डारी र १४ बर्षीया अस्मिता भण्डारी घाइते भएको जिल्ला प्रहरी कार्यालय झापाले जनाएको छ । घाइते आमा छोरीको बिर्ता सिटी अस्पताल बिर्तामोडमा उपचार भइरहेको छ ।

दोमुखा पर्यटन बोर्डले बनाएको टिनको छाना भएको १० कोठे भवनमा आगलागी भएको हो । विद्युत सर्ट भइ आगलागी हुँदा भवनमा हरी भण्डारी, जय थपलिया, किशोर पुङ्थेवा र डम्बर मगरको होटलमा क्षति भएको जिल्ला प्रहरी कार्यालय झापाका प्रवक्ता वसन्त पाठकले जानकारी दिए । दकम, कमल र बिर्तामोडको दमकल, प्रहरी र स्थानीयको सहयोगमा साढे १ बजे राति आगलागी नियन्त्रण लिइएको थियो । क्षतिको विवरण आउन बाँकी रहेको बताइएको छ ।