बिर्तामोड । शुक्रबार फरक फरक दुई घटनाका कारण झापामा दुई जनाको मृत्यु भएको छ । भद्रपुर ७ का ३८ बर्षीय अमित सिंह र भारत घर बताउने एक व्यक्तिको मृत्यु भएको हो ।

माघ ३ गते बेलुका ८:२० बजे भद्रपुर ८ विदुर बोडिङ स्कुल अगाडी भएको मोटरसाइकल दुर्घटनाबाट गम्भिर घाइते सिंहको उपचारको क्रममा शुक्रबार विहान उपचारको क्रममा बिर्तासिटी अस्पतालमा मृत्यु भएको प्रहरीले जनाएको छ । को २५ प ४७५१ नम्बरको मोटरसाइकल लिएर पश्चिमबाट पूर्वतर्फ जाँदै गरेका चालक सिंहले सोहि दिशातर्फ जाँदै गरेको भद्रपुर ६ का ७० बर्षीय इन्द्र लिवाङ लिम्बूलाई ठक्कर दिएका थिए । दुर्घटनामा परि टाउकोमा चोट लागेका सिंहलाई उपचारका लागि भद्रपुरस्थित ओमसाइ पाथिभरा अस्पतालमा सामान्य उपचारपश्चात बिर्तासिटी अस्पताल लगिएको जिल्ला प्रहरी कार्यालय झापाका प्रवक्ता वसन्त पाठकले जानकारी दिए ।

त्यस्तै शुक्रबार दिउँसो २ बजे भारत घर बताउने अन्दाजी ५०/५५ बर्षीय टुनटुन भनेर बोलाइने सडकमा मागिखाने पुरुष बिर्तामोड २ लालमाटीमा पिपलको रुखमा च्यापिएको अवस्थामा स्थानीयले देखेर प्रहरीलाई खबर गरेका थिए । इलाका प्रहरी कार्यालय घैलाडुब्बाबाट गएको प्रहरी टोलीले उद्वार गरी उपचारको लागि मेची अस्पताल भद्रपुर पठाएकोमा ३ बजे मृत्यु भएको प्रवक्ता पाठकले जानकारी दिए ।