बिर्तामोड । चाउचाउ उद्योगमा आगलागी भएको भोलिपल्टै आइतबार विहान मेचीनगर ६ भानुटोलमा रहेको पासाङ तामाङ र दिलबहादुर गुरुङको घर आगलागीबाट पूर्ण क्षति भयो । केहिदिन अघि मेचीनगरमै रहेको एसएस फुट वेयरमा आगलागी भए यता नै मेचीनगरको बारुण यन्त्र बिग्रिएको बिषयलाई लिएर रुष्ट बनेका स्थानीय आज सर्वसाधारणको घर नष्ट भएसँगै थप आक्रोशित बने ।

वारुण यन्त्र मर्मत नहुँदा धनमालको क्षति भएको भन्दै आइतबार स्थानीयले मेचीनगर–इटाभट्टा क्षेत्रमा विहान ९ बजेदेखि २ बजेसम्म टायरबालेर सडक अवरुद्ध गरे । सडकजामसँगै स्थानीयले नगर प्रमुख विमल आचार्य र उपप्रमुख मिना उप्रेती विरुद्ध चर्को नाराबाजीसमेत गरे । स्थानीयले महँगो गाडीमा मेयर उपमेयर सवार हुने तर वारुण यन्त्र मर्मतमा ध्यान नदिने भन्दै आक्रोश पोखेका थिए । नाराबाजी पछि स्थानीयले मेचीनगर नगरपालिकाको कार्यालयमा तालाबन्दी समेत गरेको स्थानीयले बताए ।

आन्दोलनकारीले नगरपालिका कार्यालयको मुख्य गेटमा तालाबन्दी समेत गरे । गेटमा तालाबन्दी गर्दा कर्मचारीहरु नगरपालिका भित्रै थुनिएका थिए । ५ घण्टा यातायातका सवारी साधानहरु अवरुद्व भएको थियो ।

भोलि आगलागी भएको ठाउँमा नगरपालिकाका मेयर र उपमेयरलाई उपस्थित गराउने सहमतीपछि सडक आन्दोलन स्थगित भएको छ । आगलागी भएको ठाउँको स्थलगत अनुगमन गर्ने साथै कमीकमजोरीको बिषयमा पालिकामा छलफल गर्ने सहमतिपछि आन्दोलन स्थगित भएको इलाका प्रहरी कार्यालय काँकरभिट्टाका प्रमुख प्रहरी नायव उपरीक्षक सुनिल दाहालले जानकारी दिए ।

स्थानीयले नगरपालिकाले २ वटा दमकल अपडेट राख्नु पर्ने माग गरेका छन् । यदि दमकल अपडेट राख्न नसके मेयर र उपमेयरले राजीनामा दिनु पर्ने माग गरेको स्थानीयले बताए ।

आइतबार विहान भएको आगलागीबाट पासाङ तामाङको घर भने पुरै जलेर नष्ट भएको छ । मेचीनगरको दमकल नहुँदा बिर्तामोडको दमकल आएको थियो ।