बिर्तामोड । वुधबार झापामा भएको छुट्टाछुट्टै सवारी दुर्घटनामा परी दुई जनाको मृत्यु भएको छ ।

पूर्वपश्चिम राजमार्ग अन्तर्गत झापाको बिर्तामोड ६ बुट्टाबारीमा भएको सवारी दुर्घटनामा एक जनाको मृत्यु भएको छ ।

दिउँसो १ बजे पश्चिमबाट पूर्व तर्फ आउँदै गरेको मे १ ज १९१८ नम्बर म्याजिक भ्यानले विपरीत दिशाबाट जाँदैं गरेको प्रदेश–१–०१–०१३ प ७३२६ नम्बरको मोटर साइकललाई ठक्कर दिँदा मोटरसाइकल चालक अर्जुनधारा ११ का ५४ वर्षीय दिलीप राजवंशी र पछाडी सवार बिर्तामोड ४ का ४९ वर्षीय कृष्ण राजवंशी घाइते भएका थिए ।

गम्भिर घाइते मोटर साइकल चालक दिलीपको उपचारको क्रममा बीएण्डसी अस्पतालमा मृत्यु भएको जिल्ला प्रहरी कार्यालय झापाका सुचना अधिकारी वसन्त पाठकले जानकारी दिए । दुवै सवारी साधन र ठक्कर दिने भ्यानका चालक मेचीनगर ६ का ४० बर्षीय गोपाल पोखरेल इलाका प्रहरी कार्यालय अनारमनीको नियन्त्रणमा रहेको प्रहरीले जनाएको छ ।

त्यस्तै, गौरादह–पाडाजुँगी सडकखण्डमा ट्रकले किचेर एक महिलाको मृत्यु भएको छ । मृत्यु हुनेमा शिवसताक्षी नगरपालिका १ की ५३ वर्षीया हिमादेवी दाहाल रहेको प्रहरीले जनाएको छ ।

प्रहरीका अनुसार गौरादह–पाडाजुँगी सडक खण्डअन्तर्गत गौरादह नगरपालिका १ स्थित गुरुङचोकमा उत्तरबाट दक्षिणतर्फ आउँदै गरेको प्रदेश १–०१–०१४ प ३३२६ मोटरसाइकलमा सवार दाहाल सडकमा अचानक लड्दा दक्षिणबाट उत्तरतर्फ जाँदै गरेको मे १ ख २६९८ नम्बरको धान बोकेको ट्रकले किचेको थियो । दाहालको घटनास्थलमै मृत्यु भएको जिल्ला प्रहरी कार्यालय झापाले जनाएको छ । दाहाललाई किच्ने ट्रक सडक छेउमा पल्टिएको थियो ।

मोटरसाइकल चालक मृतकका श्रीमान् ५६ वर्षीय नन्दलाल दाहाल भने सकुशल छन् । ट्रक, मोटरसाइकल र ट्रक चालक गौरादह १ का ३६ बर्षीय सन्तोष अधिकारी इलाका प्रहरी कार्यालय दमकको नियन्त्रणमा रहेको बताइएको छ ।