बिर्तामोड । मोरङको पथरी शनिश्चरे नगरपालिका २ की ९० वर्षीया जगमाया श्रेष्ठको हत्या आरोपमा कान्छा छोरा ४८ बर्षीय कमललाई प्रहरीले पक्राउ गरेको छ । माघ १२ गते राति वृद्धाको अन्येष्टि गरेको खबर पाएको प्रहरीले हत्या भएको आशंकामा कान्छो छोरा कमललाई पक्राउ गरेको हो । उनलाई १० दिन हिरासतमा राखेर अनुसन्धान गर्न अदालतबाट अनुमति लिएको प्रदेश प्रहरी कार्यालय विराटनगरले जनाएको छ ।

माघ १२ गतेदेखि आमा हराएको भन्दै वृद्धाका जेठा छोराले माघ १४ गते प्रहरीमा उजुरी दिएका थिए । वृद्धाको खोजी गर्ने क्रममा आफन्त र स्थानीयले शव जलाएको शंकास्पद ठाउँ देखेपछि प्रहरीलाई खबर गरेका थिए । इलाका प्रहरी कार्यालय पथरीका डीएसपी कृष्ण खड्काको टोलीले कमललाई नियन्त्रणमा लिएको हो । उनले हत्यापछि माघ १२ गते बिहान उज्यालो नहुँदै शव जलाएको प्रारम्भिक अनुसन्धानबाट खुलेको प्रहरीले जनाएको छ ।

प्रहरीका अनुसार पक्राउ परेका श्रेष्ठले बुवाको नाममा रहेको १५ कठ्ठा ९ धुर जग्गा आमा तथा परिवारका अन्य सदस्यसमेतलाई थाहै नदिई आफ्नी श्रीमतीको नाममा नामसारी गरेका थिए । परिवारले कमलको उक्त कुरा थाहा पाएपछि अदालतमा मुद्धा परेको र अदालतले आमाको नाममा ५ कठ्ठा जग्गा रहने फैसला गरेको थियो । सोही घटनाका कारण रिसको आवेशमा कमलले आमाको हत्या गरेको प्रारम्भिक अनुसन्धानबाट खुलेको प्रहरीले जनाएको छ ।