विराटनगर । मोरङको धनपालथान गाउँपालिका ७ बोर्डिङ टोलस्थित उखुबारीमा हत्या गरेर गाडिएको अवस्थामा फेला परेको दुईमध्ये एउटा शवको पहिचान खुलेको छ । बिहीबार दिउँसो उत्खनन् गरेर निकालिएको शव सुनसरीको धरान ३ घर भई भक्तपुरमा बस्दै आएका ४९ वर्षीय राजेन्द्र कुमार श्रेष्ठको रहेको मोरङ प्रहरीका प्रमुख एसपी जर्नादन जिसीले जानकारी दिए ।

प्रहरीले उनको साथबाट एनटिसीको सिम कार्ड, पर्स र सवारी चालक अनुमति पत्रपनि फेला पारेको एसपी जिसीले जानकारी दिए ।

बुधबार उखु काट्ने क्रममा किसानले खनेर पुरेको अवस्थामा खाल्डो देखेपछि प्रहरीलाई खबर गरेका थिए । सो खाल्डो उत्खनन् गर्दा प्रहरीले शव फेला पारेको थियो तर उक्त शवको पहिचान खुल्न बाँकी छ । सोही ठाउँदेखि ३० मिटर पश्चिममा विहिबार प्रहरीले श्रेष्ठको शव फेला पारेको हो । बिहीबार उखुबारीमा सात फिट गहिरो खाडल खनेर गाडेको अवस्थामा श्रेष्ठको शव भेटिएको हो । श्रेष्ठको घाँटीमा डोरीले बाँधेको डाम देखिएको छ । शव फेला परेको उखुबारी स्थानीय बरजंगी सिंहको रहेको छ ।

दुवै शवको प्रकृति एकै खाले तरिकाले खाडल खनेर गाडेको अवस्थामा भेटिएको मोरङ प्रहरीका एसपी जिसीले जानकारी दिए ।

एसपी जिसीका अनुसार दुवै शवको प्रकृति हेर्दा हत्या गरेर गाडिएको देखिन्छ । तर कुन तरिकाले हत्या गरिएको हो भन्नेबारे केही नखुलेको र पोस्टमार्टम रिपोर्टपछि थाहा हुने उनले बताए । अहिले घटनास्थलमा संघीय प्रहरी कार्यालयबाट तालिमप्राप्त कुकुर ल्याएर घटनास्थलमा स्क्रिनिङ गराइएको छ । घटनास्थल बस्तीबाट करिब ५ सय मिटर टाढा पर्छ । एकान्त र उखुबारीको बीचमा भएका कारणले हत्याराले शव गाड्न सहजै सो स्थान प्रयोग गरेको प्रहरीको निष्कर्ष छ ।