बिर्तामोड । पूर्वपश्चिम राजमार्ग अन्तर्गत झापाको कनकाई नगरपालिका ७ दुर्गापुरमा सवारी दुर्घटना हुँदा दुई जनाको मृत्यु भएको छ ।

बुधबार राति ७ः४० बजे पूर्वबाट पश्चिम तर्फ गइरहेको ना ५ ख ७९३७ नम्बरको बसले विपरित दिशातर्फ आइरहेको मे ७ प २८४६ नम्बरको मोटरसाइकललाई ठक्कर दिँदा इलाम रोङ गाउँपालिका वडा नम्बर ६ का ३३ बर्षीय सन्तोष राई र सोही ठाउँका ३५ वर्षीय चक्रबहादुर राईको मृत्यु भएको प्रहरीले जनाएको छ । दुर्घटनामा गम्भीर घाइतेद्वयको उपचारको क्रममा बिएण्डसी अस्पतालमा उपचारको क्रममा मृत्यु भएको जिल्ला प्रहरी झापाका प्रवक्ता वसन्त पाठकले जानकारी दिए ।

मृतक दुवैजना मोटरसाइकलमा सवार थिए । ठक्करदिने बस इलामको कन्याममा पिक्निक खाएर गन्तब्य स्थल इटहरीतर्फ जाँदै गरेको बताइएको छ । तीव्र गतिमा रहेको बसले आफ्नै साइडमा रहेको मोटरसाइकललाई ठक्कर दिँदा दुर्घटना भएको घटनाका प्रत्यक्षदर्शी स्थानीयवासीले बताएका छन् ।

प्रहरीले मोटरसाइकल, बस र बस चालक इलाम चुलाचुली गाउँपालिका वडा नम्बर २ बस्ने ३१ बर्षीय सरोज ढकाललाई नियन्त्रणमा लिएको छ ।