बिर्तामोड । नेपाली कांग्रेसका सभापति गगन थापाले पार्टीको क्रियाशील सदस्यता डिजिटल्ली अद्यावधिक नगर्नेहरूलाई पार्टीले सदस्यका रूपमा नचिन्ने बताएका छन् ।

मंगलबार झापामा कार्यकर्ता भेलामा सभापति थापाले अद्यावधिक नगर्नेलाई नयाँ बनाइएको सदस्यताको सिस्टमले नै पार्टी सदस्यका रूपमा नचिन्ने बताएका हुन् ।

‘अद्यावधिक नभएको कोही पनि साथीलाई नेपाली कांग्रेसले सम्मान गर्छ, माया गर्छ तर पार्टी सदस्यका रूपमा चिन्दैन,’ सभापति थापाले भने, ‘अब मैले के गर्ने ? मैले व्यक्तिगत रूपमा चिन्छु, जय नेपाल भन्छु तर अब सिस्टमले नै चिन्दैन, भोट हाल्ने बेला नाम वडामा आउँदैन ।’

पार्टीले सदस्यता व्यवस्थापन, निर्वाचन प्रक्रिया र सङ्गठन सञ्चालनलाई पूर्ण रूपमा डिजिटल प्रणालीमा आधारित बनाएको पनि बताए । त्यसैले अद्यावधिक नभएका सदस्यको नाम वडा अधिवेशनदेखि माथिल्लो तहका निर्वाचन प्रक्रियामा समावेश नहुने भन्दै यो व्यवस्था कसैलाई निषेध गर्न नभई पार्टीलाई विधिसम्मत र व्यवस्थित बनाउन लागू गरिएको बताए ।

निवर्तमान सभापति शेरबहादुर देउवा र नेता डा. शेखर कोइराला पक्षका नेताहरूले क्रियाशील अद्यावधिक गरेका छैनन् ।