एजेन्सी । जापानमा एक नेपाली महिलाको हत्या भएको छ । हत्या आशंकामा एक जनालाई प्रहरीले पक्राउ गरेको छ ।

आइतबार बिहान साढे ६ः५५ बजेतिर कपडाभरि रगत लत्पतिएको अवस्थामा विदेशी नागरिक कोनोसु प्रहरी चौकी पुगेका थिए । ती पुरुष मृतककी श्रीमान भएको उल्लेख गरिएको छ । उनी प्रहरी चौकी आएलगत्तै यो घटना बाहिर आएको हो ।

प्रहरी टोली ती पुरुषलाई साथमै लिएर उनको तीन तले अपार्टमेन्टमा पुगेको थियो । त्यहाँ अपार्टमेन्टको प्यासेजमा नेपाली महिला टाउकोबाट अत्यधिक रगत बगेर अचेत अवस्थामा ढलेकी थिइन् ।

उनलाई तुरुन्तै नजिकैको अस्पताल पुर्याइए पनि उपचारका क्रममा करिब एक घण्टापछि चिकित्सकले मृत घोषित गरेका थिए । करिब ३० बर्षीया महिला भएको उल्लेख गरिएपनि थप परिचय भने खुलाइएको छैन ।

यो घटना कसरी र किन भयो भन्नेबारे प्रहरीले हाल श्रीमानसँग सोधपुछ गरिरहेको छ । तर, ती पुरुषले अहिले दोधारे र अस्पष्ट कुरा गरिरहेकाले घटनाको वास्तविक कारण पत्ता लगाउन प्रहरीले विस्तृत रूपमा सुक्ष्म अनुसन्धान गरिरहेको समाचारमा उल्लेख छ ।