बिर्तामोड । लायन्स क्लब अफ बिर्तामोड स्माट लेडीद्वारा पाँच जनालाई सम्मान गरिएको छ । आइतबार पद हस्तान्तरणको अवसरमा परिवेश मिडियाका सम्पादक पुष्प खड्कासहित पाँच जनालाई सम्मान गरिएको हो ।

बिर्तामोडको सिपी होटलमा आयोजित कार्यक्रममा विभिन्न क्षेत्रबाट सहयोग गर्नेहरुलाई सम्मान गरिएको थियो । संस्थाको विभिन्न गतिविधीलाई पत्रकारिताको माध्यमबाट आममानिसमा पुर्याउन सहयोग पुर्याएको भन्दै  सम्पादक पुष्प खड्कालाई सम्मान गरिएको थियो । बर्ष २०२५÷२६ की अध्यक्ष यशोदा उप्रेतीसहितको कार्यसमितिलाई सहयोग गरेको भन्दै पत्रकार खड्कासहित लायन रिजन चेयर पर्सन पार्वता गिरी र डिस्ट्रिक्ट मार्केटिङ चिफ निरज ओली तथा व्यवसायीद्वय कविता पोखरेल र गोमा दंगाललाई सम्मान गरिएको थियो । उनीहरुलाई कार्यक्रमकी अध्यक्ष यशोदा उप्रेती तथा प्रमुख अतिथी आइपीडीजी विकास कार्कीले सम्मान पत्र हस्तान्तरण गरेका थिए ।

कार्यक्रममा बर्ष २०२६÷२७ का लागि निर्वाचन समिति संयोजक आइपीपी मञ्जु उप्रेतीले सरु भुर्तेल खनालको अध्यक्षतामा नयाँ कार्यसमितिको नामावली सर्वसम्मत चयन भएको घोषणा गरेकी थिइन् ।

कार्यक्रममा बर्ष २०२६÷२७ की अध्यक्ष सरु भुर्तेल खनालले आफ्नो कार्यसमितिलाई पूर्णता दिनुका साथै संस्थाको मूल्यमान्यता र सिद्धान्त अनुरुप कार्यगर्ने प्रतिबद्धता व्यक्त गरिन् । आगामी बर्षको अध्यक्ष भुर्तेल र अर्का अध्यक्ष उप्रेतीले मायाको चिनो साटासाट गरेका थिए भने सचिवले माइन्युट हस्तान्तरण गरेका थिए ।

कार्यक्रमकी अध्यक्ष उप्रेतीले सहभागीहरुलाई स्वागत गर्नुका साथै आफ्नो १ बर्षे कार्यकालमा ७० वटा सामाजिक सेवाको काम गरेको जानकारी दिँदै सो अवधिमा आफुलाई सहयोग गर्ने विभिन्न व्यक्ति, संघसंस्था तथा कार्यसमितिका पदाधिकारी तथा सदस्यहरुलाई धन्यवाद दिइन् ।

कार्यक्रममा सहभागी सम्पूर्णलाई कार्यक्रमकी अध्यक्ष उप्रेतीले मायाको चिनो हस्तान्तरण गरेकी थिइन् ।

सेकेन्ड भिपी गोमा मैनाली खड्काले झण्डाको अभिवादन वाचन गरेकी थिइन् । अर्जुनधारा वडा नं. १ का वडाध्यक्ष उपेन्द्र बस्नेत र डिस्ट्रिक मार्केटिङ चिप निरज ओलीले शुभकामना मन्तव्य राखेका थिए । सचिव शिला भट्टराई बरालले कार्यक्रम सञ्चालन गरेकी थिइन् ।