बिर्तामोड । झापाको बिर्तामोड नगरपालिकाको शैक्षिक गुणस्तर वृद्धि भएको पाइएको छ । बिर्तामोडस्थित विद्यालयहरुको शैक्षिक गुणस्तरमा विगतभन्दा यो बर्ष सुधार आएको पाइएको हो ।

शैक्षिक सत्र २०८१ मा कक्षा ८ का ९२.४७ प्रतिशत विद्यार्थी उत्तीर्ण भएकोमा २०८२ मा ९६.१६ प्रतिशत विद्यार्थी उत्तीर्ण भएको शिक्षा, युवा तथा खेलकुद विकास शाखा प्रमुख तिलचन भण्डारीले जानकारी दिए । गत बर्ष बिर्तामोडका ५६ वटा विद्यालयका २८२४ जना विद्यार्थी कक्षा ८ को परीक्षामा सहभागी भएकोमा २६५९ जना विद्यार्थी उत्तीर्ण भएको भण्डारीले बताए । सहभागीमध्ये ११ जना विद्यार्थीले ४ जीपीए ल्याएका थिए ।

त्यस्तै कक्षा ५ को परीक्षामा अघिल्लो बर्षको तुलानामा यो बर्ष १.६२ प्रतिशत बढी विद्यार्थी उत्तीर्ण भएको पालिकाले जनाएको छ । यो बर्ष ९७.६२ प्रतिशत विद्यार्थीले कक्षा ५ को परीक्षा उत्तीर्ण गरेका छन् ।