बिर्तामोड । नेपाल शैक्षिक परामर्श संघ (इक्यान) झापाको चौथो अधिवेशन तथा सातौं बार्षिक साधारण सभा कात्तिक १४ गते हुने भएको छ ।
शैक्षिक परामर्शका रुपमा काम गर्दै आएका झापाका शैक्षिक परामर्श दाताहरुको साझा संस्थाको रुपमा रहेको इक्यान झापाले दुई वर्षे कार्यकालका लागि नयाँ नेतृत्व समेत चयन गर्ने इक्यान झापाका अध्यक्ष रोशन सुवेदीले जानकारी दिए ।
इक्यान झापामा करिब ५० भन्दा धेरै कन्सल्टेन्सी ब्यवसायीहरु आवद्ध रहेका छन् । चौथो अधिवेशन तथा सातौं साधारण सभाको अवसरमा रक्तदान कार्यक्रम समेत आयोजना गरिएको अध्यक्ष सुवेदीले जानकारी दिए ।
बिर्तामोडस्थित होटल सिद्धार्थ ग्राण्डमा हुने अधिवेशनको तयारी शुरु गरिएको इक्यान झापाका सचिव अशोक भण्डारीले जानकारी दिए । परामर्श ब्यवसायीहरुलाई मर्यादित बनाउदै आफ्नो ब्यवसाय सञ्चालन गर्ने उद्धेश्यका साथ इक्यान झापाको गठन भएको थियो ।
इक्यान झापाको संस्थापक अध्यक्ष सुमन शर्मा जम्मरकटेल हुन भने निर्वतमान अध्यक्ष मिलन ओली रहेका छन् । आगामी नेतृत्व समेत सर्वसम्मत रुपमा चयन गर्ने र सहमति, सहकार्य र एकताको सन्देश सबैलाई प्रवाह गर्ने काम इक्यान झापाले गर्ने जनाइएको छ ।