झापा । शिक्षा विज्ञान तथा प्रविधि मन्त्री महावीर पुनले अमेरिकाबाट फर्केको ३२ वर्षसम्म दाताकै भरमा आविष्कारका काम गर्नेदेखि परिवार पालेको प्रतिक्रिया दिएका छन् । छोरीलाई बाङ्लादेश चिकित्सा पढाउन करोडौँ रकम कहाँबाट आयो? भन्दै सामाजिक सञ्जालमा आलोचना भइरहेका बेला मन्त्री पुनले बिहीबार फेसबुकमा एक स्टाटस राख्दै यस्तो प्रतिक्रिया दिएका हुन् ।

‘३२ वर्ष अगाडि अमेरिकाबाट फर्केर आएको र कमाई केही पनि नभएको व्यक्तिले करिब २०० भन्दा बढी गाउँमा इन्टरनेट पुर्याउन, सात वर्षदेखि आविष्कार केन्द्र सञ्चालन गरेर प्रतिभाहरूलाई निःशुल्क हुर्काउन, कोरोना महामारीमा स्वास्थ्य सामग्रीहरू निःशुल्क वितरण गर्न र ३० वर्षदेखि बन्द भएको वीरगन्ज कृषि औजार कारखाना पुनः सञ्चालन गर्न करोडौँ रुपैयाँ आम जनताले किन दान गरे भनेर बुझम त ?,’ मन्त्री पुनले लेखेका छन् ।

यस्तै उनले अगाडि लेखेका छन्,‘अहिलेसम्म मलाई र श्रीमतीलाई पाल्ने, छोरीहरूलाई पाल्ने र पढाइ दिने काम आवश्यक पर्नासाथ मेरा साथी सहयोगीले गर्छन् ।’

अहिले मन्त्री भए पनि सबै खर्च पहिले देखि नै केही शुभचिन्तक साथीहरूले पुर्याइदिएको उनले दाबी गरेका छन् । ‘मलाई ढुक्क छ । तलब भत्ता केही लिँदैन । कहीँ जाँदा हवाई जहाज टिकट, बस भाडा, ट्याक्सी भाडा म आफै तिर्ने हो,’ मन्त्री पुनले अगाडि लेखेका छन् ।

केही कुरा विस्तृत रूपमा बुझ्न चाहने भए आफ्नो आत्मकथा पढ्न पनि उनले सुझाएका छन् ।