बिर्तामोड । भदौ २४ गते जेन जी आन्दोलनको क्रममा झापाका विभिन्न हिरासतबाट फरार ८९ जना थुनुवा अझै फरार रहेका छन् । इलाका प्रहरी कार्यालय अनारमनी, दमक र झिलझिलेबाट फरार ९२ थुनुवामध्ये ८९ जना अझै फरार रहेका हुन् ।

जेन जी आन्दोलनको क्रममा प्रहरी कार्यालयमा तोडफोड र आगजनीको क्रममा ती थुनुवाहरुलाई आन्दोलनकारीले भगाएका थिए । भागेकाहरु मध्ये ३ जना प्रहरीको सम्पर्कमा आएको जिल्ला प्रहरी कार्यालय झापाका सूचना अधिकारी डीएसपी खगेन्द्रबहादुर खड्काले जानकारी दिए ।

आन्दोलनको दिन इप्रका अनारमनीमा ३६ जना, दमकमा ५१ जना र झिलझिलेमा ५ जना थुनुवा रहेको प्रहरीले जनाएको छ ।

त्यस्तै आन्दोलनकै क्रममा आन्दोलनकारीले लुटेर लगेका हतियार मध्ये अझै २४ थान हतियार फिर्ता नभएको प्रवक्ता खड्काले बताए । आन्दोलनकारीले लुटेका मध्ये केहि थान हतियार नेपाली सेनालाई बुझाएका थिए ।