बिर्तामोड । स्रोत नखुलेको १४ लाख ५० हजार रुपैँया नगदसहित एक जना पक्राउ परेका छन् । विराटनगर–१८ का ४१ बर्षीय बिरेन्द्र साहलाई प्रहरीले पक्राउ गरेको हो ।

मोरङको विराटनगर महानगरपालिका–१७ बाट मंगलबार दिउँसो साढे १ बजे अस्थायी प्रहरी पोष्ट मटेरुवा मोरङबाट खटिएको प्रहरी टोलीले चेकजाँचको क्रममा स्रोत नखुलेको रकमसहित साहलाई पक्राउ गरेको हो । भारतबाट नेपाल तर्फ आउँदै गरेको को. ३८ प ५८५१ नम्बरको मोटरसाईकल चालक साहले आफ्नो साथमा उक्त रकम लुकाई छिपाई ल्याउँदै गरेको अवस्थामा पक्राउ गरिएको प्रदेश प्रहरी कार्यालय कोशीले जनाएको छ । पक्राउ परेका साहलाई इलाका प्रहरी कार्यालय रानीबाट आवश्यक थप अनुसन्धान भईरहेको प्रहरीले जनाएको छ ।