बिर्तामोड । लागूऔषध कारोबारी भानुभक्त खरेल पुर्पक्षका लागि कारागार चलान भएका छन् । उनले सञ्चालन गरेको गोदामबाट ठूलो मात्रामा लागूऔषध फेला परेपछि फरार खरेललाई स्थानीयले पक्राउ गरी प्रहरीको जिम्मा लगाएका थिए ।

औषधी व्यवसायीको आवरण र राजनीतिक संरक्षणमा लामो समयदेखि लागूऔषध कारोबार गर्दै आएका बिर्तामोड–५ निवासी भानुभक्त खरेललाई आइतबार पुर्पक्षका लागि कारागार चलान गरिएको जिल्ला प्रहरी कार्यालय झापाले जनाएको छ । सनलाइट फर्माका सञ्चालक खरेल नेकपा एमाले बिर्तामोड नगर कमिटिको सदस्य र नेकपा एमालेको भातृ संगठन राष्ट्रिय स्वास्थ्यकर्मी महासंघ नेपाल झापाका उपाध्यक्ष हुन् ।

खरेलले सञ्चालन गर्दै आएको बिर्तामोड–५ मंगलदिप टोलस्थित मनकुमार संग्रौलाको घरबाट प्रहरीले साउन १ गते करिब ३५ लाख मुल्य बराबरको लागूऔषध बरामद गरेको थियो । गोदाममा प्रहरीले छापा मारेपछि फरार भएका खरेललाई भदौ २८ गते स्थानीयले घर नजिकैबाट पक्राउ गरी प्रहरीको जिम्मा लगाएका थिए ।

सहयोगी घिमिरे धरौटीमा छुटे

प्रहरीले खरेलको गोदाममा छापा मारेसँगै उनका कामदार अर्जुनधारा–६ दासपुल निवासी २५ बर्षीय विनोद घिमिरेलाई पक्राउ गरेको थियो । जेन जी आन्दोलनको क्रममा भदौ २४ गते बिर्तामोडस्थित इलाका प्रहरी कार्यालय अनारमनीको हिरासतबाट फरार भएका घिमिरेले असोज ४ गते प्रहरी समक्ष आत्मसमर्पण गरेका थिए । उनी आइतबार २ लाख २५ हजार रुपैँया धरौटी बुझाएर रिहा भएको जिल्ला प्रहरी कार्यालय झापाका सुचना अधिकारी डीएसपी खगेन्द्रबहादुर खड्काले जानकारी दिए ।