बिर्तामोड । भ्रष्टाचार मौलाएको र सामाजिक सञ्जाल बन्द गरेको विरोधमा जेनजीले गरेको प्रदर्शनमा १९ जनाको मृत्यु भएको छ । यो समाचार तयार पार्दासम्म प्रदर्शनको क्रममा प्रहरीले चलाएको गोली लागि काठमाण्डौमा १७ जना र सुनसरीमा २ जनाको मृत्यु भएको हो ।

युवा विद्यार्थीको प्रर्दशनमा सरकारको निर्देशनमा प्रहरीले जथाभावी गोली चलाउँदा उनीहरुको मृत्यु भएको हो । काठमाण्डौका प्रमुख जिल्ला अधिकारी छवि रिजालले भौतिक सम्पतिमा क्षति भए गोली चलाउने आदेश प्रहरीललाई दिएका थिए । गोली चलाउन माथिको आदेश नचाहिने उनको अनुमतिपछि प्रहरीले जथाभावी गोली चलाएको थियो । मृतकहरु धेरैको टाउँको र छातीमा गोली प्रहार गरेको पाइएको अस्पतालहरुले जनाएका छन् ।

ट्रमा सेन्टरमा मात्रै ७ जनाको मृत्यु भएको अस्पतालले पुष्टि गरेको छ । त्यस्तै एभरेस्ट अस्पतालमा ५ जनाको मृत्यु भएको छ । उपचारका लागि सिभिल अस्पतालमा र्पुयाइएका मध्ये ३ प्रदर्शनकारीको मृत्यु भएको अस्पताल प्रशासनले जानकारी दिएको छ । काठमाण्डौ मेडिकल कजेलमा २ जना जनाको र टिचिङ अस्पतालमा १ जनाको मृत्यु भएको प्रहरीले जनाएको छ । त्यस्तै इटहरीमा गोली लागेका २ जनाको बिपी कोइराला स्वास्थ्य विज्ञान प्रतिष्ठान धरानमा मृत्यु भएको छ । 

मृत्यु हुनेहरूमा ग्लोबल कलेजमा अध्ययनरत श्रीराम चौलागाईं, बाँकेका २१ वर्षीय सुलभ राज श्रेष्ठ र कीर्तिपुर बस्ने ४२ वर्षीय बुद्धि बहादुर तामाङ रहेका छन् । बाँकीको सनाखत हुन बाँकि रहेको छ ।

*मृतकको तथ्याङ्कमा त्रुटी भएकाले सच्याइएको छ ।