बिर्तामोड । पछिल्लो समय करेन्ट लगाएर माछा मार्दा मानिसको मृत्यु हुने क्रम बढ्दै गएको छ । माछा मार्न लगाएको करेन्ट लागेर झापामा तीन हप्तामा तीन जनाको मृत्यु भएको हो ।

शनिबार बिहान अन्दाजी ८ः३० बजे कनकाई नगरपालिका वडा नम्बर १ स्थित खहरे खोलामा करेन्ट लगाएर माछा मार्ने क्रममा स्थानीय ३७ बर्षीय पंकज माझीको मृत्यु भएको छ । माझीले विजुलीको पोलबाट तार तानी करेन्ट लगाएर माछा मार्ने क्रममा आफैँलाई करेन्ट लागेर मृत्यु भएको प्रहरीले जनाएको छ ।

घटनाको सम्बन्धमा थप अनुसन्धान तथा कानुनी प्रक्रियाका लागि इलाका प्रहरी कार्यालय अनारमनीबाट प्रहरी टोली खटिएको जिल्ला प्रहरी कार्यालय झापाले जनाएको छ ।

गत बुधबार माछा मार्ने क्रममा कमल गाउँपालिकास्थित ढ्याङ्ग्रे खोलामा करेन्ट लागेर २१ बर्षीय उज्वल राईको मृत्यु भएको थियो भने साउन २५ गते हल्दिबारीमा संखुवासभा जिल्ला चैनपुर नगरपालिका वडा नम्बर २ का बर्ष अन्दाजी ३१ का रामकुमार अधिकारीको मृत्यु भएको थियो ।