बिर्तामोड । प्रधानमन्त्री तथा नेकपा एमाले अध्यक्ष केपी शर्मा ओलीले आज दुई अस्पताल भवन उद्घाटन गरेका छन् । उनले झापा र इलाम जिल्लाका एक–एक नगर अस्पताल भवन उद्घाटन गरेका हुन् ।

शनिबार विहान झापा आएका ओलीले एक समारोहबीच झापाको बुद्धशान्तिस्थित भागीरथा न्यौपाने बुद्धशान्ति अस्पताल र माइ नगरपालिकाको सिमली स्थित माइ नगर अस्पताल भवन उद्घाटन गरेका हुन् । बुद्धशान्ति गाउँपालिका–३ मा दाताले दिएको १५ कठ्ठा जग्गामा रु छ करोड ५० लाखको लागतमा १० शैया रहेको अस्पताल निर्माण गरिएको छ भने माइ नगरपालिका–२ मा रु १० करोड ७० लाख २४ हजार लागतमा साढे १० रोपनी क्षेत्रफलमा १५ शैय्याको पार्किङसहितको दुई तलाको अस्पताल निर्माण गरिएको छ ।

त्यस्तै प्रधानमन्त्री ओलीले माइ नगरपालिका र कनकाई नगरपालिकाका अव्यवस्थित बसोबासीहरुलाई जग्गा धनीपूर्जा हस्तान्तरण गरेका थिए ।