बिर्तामोड । प्रधानमन्त्री तथा नेकपा एमाले अध्यक्ष केपी शर्मा ओली शनिबार झापा आउन लागेका छन् । शनिबार र आइतबार दुई दिनका लागि उनी झापा आउन लागेका हुन् ।

शनिबार ११ बजे चन्द्रगढी विमानस्थलहुँदै झापा आउन लागेका ओलीले शनिबार ११:३० बजे बुद्धशान्ति वडा नम्बर ३ स्थित भागिरथा न्यौपाने अस्पताल उद्घाटन गर्ने, माइ नगरपालिका वडा नम्बर २ स्थित नगर अस्पताल उद्घाटन गर्ने, धनीपूर्जा वितरण र खानेपानी आयोजनाको शिलन्यास गर्ने कार्यक्रम रहेको नेकपा एमाले झापाका उपाध्यक्ष शिव ढुंगेलले जानकारी दिए ।

शनिबार नै प्रधानमन्त्री ओलीले झापाको कनकाई नगरपालिकामा जग्गा धनीपूर्जा वितरण गर्ने र कनकाई उद्योग वाणिज्य संघको भवन उद्घाटन गर्ने कार्यतालिका रहेको छ ।

त्यस्तै आइतबार बिहान १० बजे दमक नगरपालिकाद्वारा आयोजित कृष्ण मन्दिरबाट उत्तरपट्टिको मदनडाँगी तारावारी डिपो सडक बाटोको उद्घाटन गर्ने ११:३० बजे हुलाकी सडकस्थित गौरीगञ्ज पश्चिम रतुवा पुलको उद्घाटन गर्ने र दिउँसो १२:३० बजे बिर्तामोडको कार्यकर्ता भेलामा सहभागी हुने र २ बजे विर्तामोडको सिटीसेन्टरमा कार्यकर्ता भेलालाई सम्बोधन गरेर ३:३० बजे काठमाण्डौ फर्कने तालिका रहेको ढुंगेलले जानकारी दिए ।