काठमाण्डौ । सरकारले वैदेशिक रोजगारीमा जाने नेपालीहरूलाई बिना धितो ऋणको व्यवस्था गर्न लागेको जनाएको छ ।

श्रम, रोजगार तथा सामाजिक सुरक्षा मन्त्री शरतसिंह भण्डारीले वैदेशिक रोजगारीमा जाने नेपालीहरूलाई मिटरब्याजीको पासोबाट मुक्त गर्न बिना धितो ऋणको व्यवस्था गर्न लागिएको बताएका हुन् ।

श्रमिकको स्वास्थ्य सुरक्षा सुनिश्चित गर्न स्वास्थ्य परीक्षण प्रक्रियालाई पूर्ण रूपमा डिजिटल बनाउन लागेको समेत बताए ।

प्रतिनिधिसभा बैठकमा सांसद् प्रेम सुवालले राखेको प्रश्नमा जवाफ दिँदै मन्त्री भण्डारीले वैदेशिक रोजगार क्षेत्रमा रहेका विकृतिलाई अन्त्य गर्न सरकारले नीतिगत सुधारका लागि महत्त्वपूर्ण कदम चालेको बताए ।

मन्त्रीले वैदेशिक रोजगारीमा जाने युवाहरू चर्को ब्याजदरमा ऋण लिन बाध्य हुँदा ठगीमा पर्ने गरेको स्विकार्दै यस समस्याको समाधानका लागि नेपाल राष्ट्र बैंकसँगको सहकार्यमा बिना धितो ऋण उपलब्ध गराइने बताए ।

‘अब श्रमिकहरूले बैंकबाटै सहज किस्तामा तिर्न सक्ने गरी ऋण पाउनेछन्, जसले उनीहरूलाई मिटरब्याजीको चङ्गुलबाट जोगाउनेछ,’ मन्त्री भण्डारीले भने ।