बिर्तामोड । नारी सञ्चार गृह झापाद्वारा झापाका दुई पत्रकार पुरस्कृत भएका छन् । राष्ट्रिय समाचार समिति (रासस)की जिल्ला संवाददाता अम्बिका भण्डारी र नयाँ पत्रिका दैनिकका झापा संवाददाता चिरञ्जिवी घिमिरे पुरस्कृत भएका हुन् । 

नारी सञ्चार गृह झापाद्वारा स्थापित १ लाख पुरस्कार राशीको ‘नारी सञ्चार साधना’ पत्रकारिता पुरस्कार भण्डारीलाई समर्पण गरिएको थियो । त्यस्तै २५ हजार नगद राशीको युवा पत्रकारिता पुरस्कार घिमिरेलाई प्रदान गरिएको हो ।

आज बिर्तामोडमा आयोजित पद हस्तान्तरण तथा पुरस्कार वितरण कार्यक्रममा कार्यक्रमका प्रमुख अतिथी बिर्तामोड नगरपालिकाकी प्रमुख पवित्रादेवि महतारा प्रसाईले पुरस्कृतद्वयलाई पुरस्कार राशीसहित सम्मान पत्र प्रदान गरेकी थिइन् ।

सोहि कार्यक्रममा नयाँ कार्यसमितिलाई पद हस्तान्तरण गरिएको थियो । नारी सञ्चार गृहको भर्खरै सम्पन्न अधिवेशनबाट स्वस्तिका आचार्यको अध्यक्षतामा चयन भएको नयाँ समितिलाई प्रमाण पत्र प्रदान गरिएको थियो ।

नारी सञ्चार गृहकी अध्यक्ष रेजिना गौतमको अध्यक्षतामा सम्पन्न कार्यक्रमको सञ्चालन संस्थाकी सचिव मायामितु न्यौपानेले गरेकी थिइन् ।