बिर्तामोड । आफ्नै साझेदारलाई कम्पनीमा ५० लाख शेयर हाल्ने भन्दै अढाई करोड ऋण बोकाएको आरोपमा बिर्तामोडबाट एक जना पक्राउ परेका छन् । बिर्तामोड–२ चारपाने निवासी तिलकचन राजवंशीलाई जालसाँझी गरेर ठगि गरेको आरोपमा बिर्तामोड २ बस्ने ६३ वर्षीय मनोरथ भेटवाललाई प्रहरीले पक्राउ गरेको हो ।

जिल्ला अदालत झापाको पक्राउ आदेश अनुसार ठगी सम्बन्धी कसुर मुद्धामा अनुसन्धानको सिलसिलामा भेटवाललाई इलाका प्रहरी कार्यालय सुरुङ्गाबाट खटिएको टोलीले आज दिउँसो कनकाई  वडा नं. ४ कोटीहोमबाट नियन्त्रणमा लिएको हो । उनलाई थप अनुसन्धान तथा कानुनी प्रकृयाको लागि इलाका प्रहरी कार्यालय बिर्तामोड ल्याइएको छ ।

भेटवाललाई पक्राउ गर्न विप्लव नेकपाका नेता कार्यकर्ताले सहयोग गरेका थिए । एनआइसी एसिया बैंक सुरुङ्गा शाखाका प्रमुख लेखनाथ अधिकारी भने सम्पर्कमा आएका छैनन् । उनी कार्यालयमै निरन्तर रहेपनि प्रहरीले बेवास्ता गरेपछि पीडित राजवंशीले विप्लव नेतृत्वको नेपाल कम्युनिस्ट पार्टी झापामा निवेदन दिएका थिए । बैंक म्यानेजर अधिकारीसहित ६ जना विरुद्ध जिल्ला अदालत झापाले २०८१ माघ २९ गते पक्राउ पुर्जी जारी गरेको थियोे । अदालतले पक्राउ पुर्जी जारी गरेपनि प्रहरीले भने बेवास्ता गर्दै आएको थियो ।

हार्डवेयर पसल खोल्ने क्रममा साझेदारहरुका कारण राजवंशीको बेहाल भएको हो । ५० लाख रुपैयाँ शेयर हाल्ने भनेर व्यवसायमा हात हालेका उनी अहिले अढाइ करोडभन्दा बढीको ऋणमा डुबेको पारिवारिक श्रोतले बताएको छ । बिर्तामोड–२ चारपानेका युनिस भेटवाल र बिर्तामोडका लब मैनालीले संयुक्त रुपमा तीन वर्षअघि चारपानेमा ओम शिवम् ट्रेडर्स नामक हार्डवेयर होलसेल पसल सञ्चालनमा ल्याएका थिए । मैनालीले व्यवसाय छोडेपछि तिलकचन र बिर्तामोडका धर्मप्रसाद संग्रौला जोडिए । त्यसपछि उनीहरुले साविक ओम शिवम् ट्रेडर्सको नाम परिवर्तन गरी ओम शिवम् ट्रेडर्स प्रालि राखे । तीन सदस्यीय नयाँ कम्पनीमा संग्रौलाले ५० लाख र आफूले ५० लाख रुपैयाँ शेयर हाल्ने सहमति भएको राजवंशीको भनाई छ ।

पुरानो कम्पनीको दायित्व नयाँ कम्पनीले तिरोभरो गर्ने कम्पनीको प्रबन्धपत्रमा उल्लेख थियो । तर, राजवंशीले भने सो विषयमा आफूलाई जानकारी नभएको बताएका छन् । राजवंशीको नाममा बिर्तामोड–२ मा रहेको एक कठ्ठा १२ धुर र कम्पनीको नाममा रहेको तीन कठ्ठा जग्गा राखेर एनआइसी एसियाको सुरुङ्गा शाखाबाट पाँच करोड ५० लाख रुपैयाँ ऋण निकालिएको छ ।

‘मैले ५० लाख शेयर हाल्ने गरी कम्पनीका अध्यक्ष युनिस भेटवालले धनीपुर्जा लग्नुभएको थियो’ , उनले भने, ‘पछि मालपोतमा जग्गा रोक्का गर्न जाँदा २ करोड २४ लाख ऋण निकाल्न लागिएको बुझेपछि मैले हुँदैन भनेँ तर यो भ्यालुएसन मात्र हो तपाईंको ऋण ५० लाख मात्र हो भनियो ।’ कम्पनीका अध्यक्ष युनिसका बुबा मनोरथ भेटवाल र बैंकका कर्मचारीको मिलेमतोमा अधिक मूल्यांकन गरेर ऋण निकालिएको राजवंशीको आरोप छ ।