बिर्तामोड । झापाको कनकाई नगरपालिकाले समाचार प्रकाशनका लागि लाखौँ रकम खर्च गरेको पाइएको छ । आर्थिक बर्ष २०८०/८१ मा नगरप्रमुखको अन्तरवार्ता र नगरसम्बन्धि समाचार प्रकाशनका लागि २ लाख १५ हजार ८६४ रुपैँया भुक्तानी गरेको पाइएको हो ।

कनकाईले पत्रपत्रिका छपाई तथा सुचना प्रकाशन खर्च शिर्षकबाट मकालु एड्भर्टाइजिङ प्रालिलाई सो रकम भुक्तानी गरेको छ । नगरसँग सम्बन्धित सुचना तथा समाचार पत्रपत्रिकामा स्वत प्रकाशन हुनुपर्नेमा कनकाईले लाखौँ खर्च गरेको भन्दै महालेखाले प्रश्न गरेको छ । नगरपालिकाले भुक्तानी दिने संस्था मकालु एड्भर्टाइजिङ प्रालिसँग कुनै सम्झौतासमेत नगरेको पाइएको छ ।

मकालु एड्भर्टाइजिङ प्रालिले कारोबार दैनिक पत्रिकाको अन्तिम पृष्ठमा नगर प्रमुखको अन्तरवार्ता र नगरसँग सम्बन्धित समाचार प्रकाशन गरेको कागजात पेश गरेर भुक्तानी लिएको कार्य नियमसम्मत नभएको नायव महालेखापरीक्षक बालकृष्ण थापाले बताए ।

त्यस्तै नगरपालिकाले प्रमाण पेश नगरी विज्ञापनका लागि ५ लाख ५ हजार रुपैँया खर्च गरेको महालेखा परीक्षकको कार्यालयले जनाएको छ । कनकाईले साइन हब प्रालिलाई बिना प्रमाण सो रकम भुक्तानी गरेको हो ।

कनकाईको आर्थिक बर्ष २०८०/८१ मा मात्र ६ करोड ९० लाख १४ हजार बेरुजु रहेको छ भने हालसम्मको अद्यावधिक बेरुजु १६ करोड १५ लाख ६२ हजार रहेको छ ।