बिर्तामोड । झापाको बिर्तामोड नगरपालिकाले कृषिको व्यवसायीकरण र आधुनिक प्रविधिको प्रयोगमा जोड दिएको छ । पालिकाले आर्थिक बर्ष २०८१/८२ मा ‘कृषकको समृद्धि व्यवसायीकरण र आधुनिक प्रविधि’ भन्ने नाराका साथ कार्यक्रम कार्यान्वयन गरेको हो ।

बिर्तामोड नगरपालिकाले चालु आर्थिक बर्षको नीति, बजेट तथा कार्यक्रममा नै कृषकको समृद्धि व्यवसायीकरण र आधुनिक प्रविधि भन्ने नारालाई समेटेको छ । सोहि नारा अनुरुप कृषि विकासका लागि विभिन्न कार्यक्रमहरु तर्जुमा गरिएको थियो । पालिकाले १४ वटा बुँदामा कृषि विकास नीति समेटेर योजना तर्जुमा तथा कार्यान्वयन गरेको नगर प्रमुख पवित्रा महतारा प्रसाईले जानकारी दिइन् ।

आधुनिक कृषिको आधारस्तम्भ कृषिमा यान्त्रिकीकरण कार्यक्रमलाई निरन्तरता दिई कृक्षकहरुलाई मकै छोडाउने मेशिन, चिया पत्ती टिप्ने मेशिन र आधुनिक स्प्रेयर मेसिन उपलब्ध गराएको छ । पालिकाले सिंचाई कृषिको पहिलो आधार भएको भन्दै २४२१ विगाह क्षेत्रफलमा सिचाई सुविधा पुर्र्याएको जनाएको छ ।

मेयर विषादिमुक्त नगर कार्यक्रमलाई निरन्तरता दिएको बिर्तामोडमा १५७ जना व्यवसायिक कृषकहरु तरकारी उत्पादनमा आवद्ध मै व्यवसायिक तरकारी उत्पादन गरिरहेको कृषि अधिकृत राजेन्द्र कडरियाले जानकारी दिए । कार्यकममा आवद्ध कृषकहरुलाई तरकारी उत्पादन सम्बन्धी उच्च प्रविधिको तालिम दिनुका साथै विषादी न्यूनीकरणका वैकल्पिक पद्धतिहरु सम्बन्धी तालिम प्रदान गरिएको उनले बताए ।

बिर्तामोडका किसानले उत्पादन गरेका अर्ग्यानिक तरकारी विक्री केन्द्रमार्फत बिक्री गर्न पालिकाले सहजीकरण गरेको बताईएको छ ।

माटोको उत्पादकत्व वृद्धि गर्न माटो परिक्षण र माटो सुधार कार्यक्रमलाई पालिकाले निरन्तरता दिएको छ ।

आलु तथा प्याज बालीको बृहत र व्यवसायिक उत्पादनका लागि एक समुह एक उत्पादन कार्यक्रम मार्फत व्यवसायिक उत्पादनलाई निरन्तरता दिएको छ । कृषकहरुले लगाएको धान तथा मकै बालीमा रोग तथा किरावाट हुने क्षति न्यूनीकरण गर्न प्रत्येक वर्ष सञ्चालन गर्दै आएको आकस्मिक बाली संरक्षण कार्यक्रमलाई यो वर्ष पनि निरन्तरता दिएको छ ।

पालिकाले मेयर पकेट प्याकेज बाख्रा साटासाट कार्यक्रममार्फत पनि कृषकलाई व्यवसायीक बन्न प्रेरित गरिरहेको छ । बिर्तामोडले कृषि विकासको क्षेत्रमा एक करोड बजेट विनियोजन गरी विभिन्न कार्यक्रम सञ्चालन गरेको हो ।