बिर्तामोड । नेपालमा लागूऔषध कारोबारी र प्रयोगकर्ताको संख्या दिनानुदिन बढिरहेको छ । खुला सीमा नाका र भारतीय पक्षले कडाइ नगर्दा नेपालमा लागूऔषध छ्याप्छ्याप्ती पाइन थालेको हो ।

चालु आर्थिक बर्षको बैशाख मसान्तसम्म लागूऔषध कारोबारमा संलग्न २४ जना भारतीयसहित ४११ जना पक्राउ परेका छन् । पक्राउ परेकाहरु मध्ये २६ जना महिला रहेको जिल्ला प्रहरी कार्यालय झापाका सुचना अधिकारी डीएसपी खगेन्द्रबहादुर खड्काले जानकारी दिए । भारतीय पक्षले कडाइ नगर्दा भारतीय सिमावर्ती बजारबाट सहज रुपमा लागूऔषध नेपाल भित्रिने गरेको स्रोत बताउँछ । भारतीय नागरिकलाई लागूऔषध खरिद बिक्रीमा कडाइ गरिएपनि नेपाली खरिदकर्तालाई बिक्री गर्नमा कडाइ नगरिँदा नेपाली लागूऔषध दुर्व्यसनीको संख्या बढेको जानकारहरु बताउँछन् ।

प्रहरीले लागूऔषध ओसारपसारमा कडाइ गरेपनि प्रहरीले मात्र नियन्त्रण गर्न सम्भव नहुने प्रहरीहरु बताउँछन् । नेपालबाट भारत लगिने गाँजाको कारोबारमा नेपाल प्रहरीले शुन्य सहनशिलता अपनाएपनि अन्य लागूऔषध कारोबारमा भारतीय पक्षले गम्भीरताका साथ नलिएको एक प्रहरी अधिकृतले गुनासो गरे ।