बिर्तामोड । कोशी प्रदेशका सांसद चढेको गाडी मोरङको कानेपोखरीमा दुर्घटनामा परेको छ । पूर्व आउँदै गरेको बा ५ च ३५२० नम्बरको रातो कार र विराटनगर जाँदै गरेको बिएइ १४०६ नम्बरको सांसद सवार अर्को कार आपसमा ठोक्किएर दुर्घटना भएको हो ।

कारमा प्रदेश सभा सदस्यहरू नम्बरलाल धिमाल, राधाकृष्ण खनाल, मैयाँ श्रेष्ठ र विद्या चाम्लिङ सवार थिए । उनीहरु प्रदेशसभाको बैठकमा सहभागी हुन जाँदै गरेको बुझिएको छ ।

सांसदहरु सवार गाडीलाई ठक्कर दिने कारका चालक जिल्ला प्रहरी कार्यालय झापामा कार्यरत प्रहरी नायव उपरीक्षक खगेन्द्रबहादुर खड्का थिए भने सांसद सवार कारका चालक झापा दमक नगरपालिका १ का ४० वर्षीया भेषराज श्रेष्ठ रहेको मोरङ प्रहरीले जनाएको छ । दुर्घटनाका कारण कुनै पनि मानवीय क्षति भने भएको छैन ।

सांसद मैया श्रेष्ठ लावतीले आफूहरूलाई चोटपटक नलागेको तर गाडीमा भने क्षति पुगेको बताइन् ।  उनले भनिन्, ‘मेरै गाडीमा आउँदै थियौँ तीव्र गतिमा आएको गाडीले एक्कासि ठक्कर दियो । हामी सकुशल छौँ ।’

सांसद मैया श्रेष्ठ लावती नेपाली काँग्रेसकी सांसद हुन । यस्तै राधाकृष्ण खनाल एमालेका सांसद हुन् । उनी झापा क्षेत्र नं. ४ (१) बाट निर्वाचित भएका हुन् । नम्बरलाल धिमाल झापाकै एमालेका समानुपातिक सांसद हुन् । सांसद बिध्या चाम्लिङ भने नेकपा एसको समानुपातिक सांसद हुन् । घटनाको विषयमा थप अनुसन्धान भइरहेको प्रहरीले जनाएको छ ।