झापा । नेकपा (माओवादी केन्द्र) निकट पत्रकारहरूको संगठन प्रेस सेन्टर नेपालको चैत १६ र १७ गते काठमाण्डौमा हुने पाँचौ राष्ट्रिय महाधिवेशनको सरगर्मी ह्वात्तै बढेको छ ।

भावी अध्यक्ष पदका लागि हालसम्म ९ जनाले आकाङ्क्षा देखाएका छन् । नेतृत्वमा वर्तमान अध्यक्ष विष्णु सापकोटा (जुगल)ले फेरि दोहोरिने चाहना देखाएका छन्  भने, वरिष्ठ उपाध्यक्ष कमल गिरी, उपाध्यक्ष निर्मल ज्ञवाली, दीपेन्द्र रावल, लक्ष्मण खड्का  सुरेश यादवपनि आकांक्षी छन् ।  यसैगरी बर्तमान महासचिव सन्तोष पौडेल तथा नेताहरु मनोज घर्ती मगर र बबिन शर्माले पनि अध्यक्षमा आकाङ्क्षा देखाएका छन् ।

जसमध्ये जुगल, पौडेल र ज्ञवाली संस्थापन पक्ष निकट मानिन्छन् । यस्तै गिरी नारायणकाजी श्रेष्ठ निकट मानिँदा रावल जनार्दन र शर्मा बर्षमान पुन निकट मानिन्छन् भने घर्ती मगर पुर्व उपराष्ट्रपति पासाङ निकट मानिन्छन् ।

यी आकांक्षीमध्येबाट सहमति जुटाउन प्रयास भएपनि हालसम्म कुनै निचोड निस्कन नसकेको बताइएको छ । अन्तिम समयसम्म सहमति हुन नसके चुनाव नै गर्नुपर्ने अवस्था आउन सक्ने सम्बद्ध नेताहरू बताउँछन् ।

यसअघि माओवादी निकट विद्यार्थी संगठन अनेरास्ववियु(क्रान्तिकारी) मा पनि नेतृत्व चयनका लागि निर्वाचन भएको थियो ।

चुनावी माहोलकै बिच सहमतिबाट नै नेतृत्व छनोटको प्रयासस्वरुप बिहीबार खुमलटारमा पार्टी अध्यक्ष प्रचण्ड र सेन्टरका पदाधिकारीबिच छलफल भएको छ । तर, उक्त छलफलमा नेतृत्वबारे सहमति नभएको सहभागी एक नेताले बताए ।

बर्तमान अध्यक्ष सापकोटाले भने आजको छलफलमा अध्यक्षका दाबेदार सबैले आ–आफ्ना धारणा राखेको र सहमतिको प्रयास जारी रहेको जिकिर गरे । अध्यक्ष प्रचण्डले सकभर सहमतिमै नभए मतदान प्रक्रियाबाट अगाडि बढेमा पार्टीले हस्तक्षेप नगर्ने बताएको उनले जानकारी दिए ।

बिहीबार खुमलटारमा भएको छलफलमा ११ जना पदाधिकारी सहभागी भएको बताइएको छ ।

खुमलटारमा भएको छलफलमा अध्यक्षका दाबेदार सबैले आ–आफ्नै दाबी गरेकाले कुनै सहमति नभएको सहभागी अर्का एक नेताले जानकारी दिए । ती नेताका अनुसार प्रचण्डले ‘थ्री इन वान’ मोडेलमा जान आग्रह गरेको बुझिएको छ ।

‘छलफलमा आकांक्षी सबैले आ–आफ्नै दाबी गरे । सहमति भएन । अध्यक्ष प्रचण्डले थ्री इन वान (संस्थापन, बिच र युवा) लाई समेट्ने मोडेलमा जानोस् भन्नुभयो । संस्थापन मात्र समेट्ने  होइन, बिचको मात्रै पनि होइन । युवा मात्रलाई समेट्ने पनि होइन, सबै जेनेरेसलाई समेट्ने गरी नेतृत्व छनोट गर्नोस्’, प्रचण्डको भनाइ उदृद्ध गर्दै ती नेताले भने ।

यसकै नेतृत्वमा जाऊ नभनेपनि सहमतिमै नेतृत्व छनोट गर्नेगरी अगाडि बढ्न प्रचण्डले आग्रह गरेको ती नेताको भनाइ छ ।

पार्टीको तर्फबाट थप प्रस्ट पार्दै प्रचण्डले भने, अनौपचारिक रुपमा कुनै सन्दर्भमा ‘वरिष्ठ उपाध्यक्षलाई बनाए पनि हुन्छ पनि भनियो होला तर पार्टीले यो नै अबको अध्यक्ष हो भनेर भनेको छैन । तपाईं  उपाध्यक्षहरू मिलेर एकजनामा सहमति गरेपनि वा महासचिवलाई अध्यक्ष बनाएर गए पनि हुन्छ । वा पदाधिकारीभन्दा बाहिरबाट कुनै फ्रेस युवालाई ल्याए पनि हुन्छ । यसैलाई बनाऊ भन्न मिल्दैन सहमतिमै नेतृत्व छनोट गर्नोस् । औपचारिक रूपमा कसैलाई यहि भनिएको छैन । सके तपाईंहरु आफै सहमति गर्नुस् सहमति नभए प्रक्रियामा अगाडी बढ्नुस पार्टीले हस्तक्षेप गर्दैन तर अबको नेतृत्व आजको बिज्ञान प्रबिधिको नयाँ–नयाँ चुनौतीको सामना गर्न सक्ने योग्य नेतृत्व हुनुपर्दछ । 

आजको छलफलमा अध्यक्ष सापकोटाले कुनै धारणा राखेका थिएनन् । रावलले आफू युद्ध पत्रकार भएको, लामो समय मिडियामा काम गरको र एआईबारे राम्रो जानकार रहेकाले नेतृत्वका लागि सक्षम भएको बताएका थिए ।

वरिष्ठ उपाध्यक्ष गिरीले संगठन हाँक्न सक्ने क्षमता र अनुभव दुबै आफूमा रहेको र सोपान अनुसार पनि आफु अध्यक्षका लागि योग्य भएको दाबी गरेका थिए । सकेसम्म आफ्नै नेतृत्वमा सहमतिबाट नै नेतृत्व छनोट गर्नुपर्नेमा जोड दिएका थिए ।

अध्यक्षका अर्का दाबेदार निर्मल ज्ञवाली र महासचिव सन्तोष पौडेलले सहमतिबाट जुगल नै अध्यक्ष भएमा आफूलाई आपत्र् िनहुने धारणा राखेको अर्का एक सहभागीले बताए ।

यसअघि चैत १२ गते प्रचार विभाग प्रमुख अग्निप्रसाद सापकोटाले सर्वसम्मत नेतृत्व चयनका लागि केन्द्रीय कार्यालय पेरिसडाँडामा छलफल गरेका थिए ।

सहमति नभए त्रिपक्षीय भिडन्त

सहमतिको प्रयास असफल भएमा अन्तिममा चुनावी मैदानमा त्रिपक्षीय भिडन्त हुने सम्भावना बलियो बन्ने अर्का एक नेताले बताएका छन् । ती नेताका अनुसार संस्थापन पक्षबाट सर्वसम्मत भएमा जुगल नभएमा ज्ञवाली र पौडेलमध्ये एक दाबेदार रहनेछन् । उपमहासचिव शर्मा निकटको तर्फबाट रावल बलिया दाबेदार हुन् । पार्टी वरिष्ठ उपाध्यक्ष श्रेष्ठको तर्फबाट गिरि पनि  बलिया दाबेदार हुन् । चुनावी प्रतिस्पर्धामा जाँदा जुगल प्रतिस्पर्धाको रिङबाट बाहिरिन सक्ने ती नेताले जिकिर गरे ।

‘सहमति हुने सम्भावना एकदमै न्यून छ । निर्वाचन प्रक्रियामा जाने ९९ प्रतिशत सम्भावना देखिन्छ । यदि सहमति भएन भने जुगलजीलाई चुनावी प्रतिस्पर्धामा जानुहुन्छ जस्तो मलाई लाग्दैन । यस्तो अवस्थामा संस्थापन पक्षबाट निर्मल र सन्तोषमध्ये एक जना आउने सम्भावना देखिन्छ । ‘नारायणकाजी निकटबाट कमलजी र जनार्दन निकटबाट दीपेन्द्रजीको बलियो सम्भावना देखिन्छ । अर्का उपमहासचिव वर्षमानको तर्फबाट बबिनजी र पासाङको तर्फबाट  मनोजजीले पनि आकाङ्क्षा देखाउनु भएको छ । तर प्रतिस्पर्धा त्रिपक्षीय हुने सम्भावना बलियो छ’, ती नेताले भने ।

गिरिमाथि जनयुद्ध लडेको लाइसेन्स नभएको नेताका रूपमा संगठनभित्रै आलोचना हुने गरेको छ । यद्यपि उनले आफूले जनयुद्ध प्रत्यक्ष नलडेपनि सोपानअनुसार आफूलाई अध्यक्ष पदको प्रमुख दाबेदारको रूपमा दाबी गर्दै आएका छन् ।

संस्थापन पक्षबाट जुगल अगाडि नसरे महासचिव पौडेलको सम्भावना बलियो रहेको ती नेताको जिकिर छ  । निर्मल संगठनमा उपत्यकाको इन्चार्ज रहेको हुँदा देशभरी उनको पकड नरहेकाले पौडेललाई प्रचण्डले अगाडि सार्न सक्ने सम्भावना देखिन्छ ।

यता महासचिवमा पार्टी उपमहासचिव जनार्दन निकट दीपेन्द्र शर्मा बलियो दाबेदार रहेको बुझिएको छ । शर्माले सबैपक्षलाई रिझाएकाले सर्वसम्मत उम्मेदवार बन्न सक्ने बुझिएको छ । यसैगरी सुनिल खड्का पनि महासचिवको दाबेदार हुन् ।

नेतृत्वमा प्रेस सेन्टरको निर्वाचनमा संस्थापकहरू चाहना के रहन्छ भन्नेले पनि प्रभाव पार्ने अर्का एक नेताले बताए । संस्थापक ओम शर्मा, महेश्वर दाहाल, खिलबहादुर भण्डारी, गोविन्द आचार्य लगायत नेताहरु अहिलेसम्म कतै खुलेका छैनन् ।

एक सय १९ सदस्यीय केन्द्रीय समितिमा ९९ जना प्रतिनिधिबाट चुनिने व्यवस्था विधानमा छ । २० प्रतिशत अध्यक्षको प्रस्तावमा केन्द्रीय समितिले मनोनयन गर्नेछ । २९ सदस्यीय पदाधिकारीमा अध्यक्ष १, वरिष्ठ उपाध्यक्ष १, उपाध्यक्ष (खुला ३, महिला १, समावेशी १), महासचिव १, उपमहासचिव (खुला १, महिला १, दलित १, मधेसी १, आदिवासी/जनजाति १), सचिव (खुला २, महिला १, समावेशी १, प्रत्येक प्रदेशबाट १/१ जना), कोषाध्यक्ष १ रहने विधानमा उल्लेख छ ।